İşğal etilgen Qırımda devlet hainliginden şübheli sayılıp apiske alınğan qırımlı İvan Yatskin «Lefortovo» Moskva tahqiqat komitetinden Ukraina prezidenti Volodımır Zelenskıy ve Ukraina Yuqarı Radasınıñ insan aqları vekâletlisi Lüdmila Denisovağa mektüp yazıp, onı deñişim cedveline kirsetmege ve qorantasına maddiy yardım köstermege rica etti, dep haber ete Azatlıq Radiosınıñ mühbiri.
Bu eki mektüpniñ metinleri pek oşay. Yatskin, 20 yıl koloniyada qalmasına üküm etile bile, dep bildirdi, onıñ üç küçük balası bar ve yaqında daa bir qızı doğdı. Bundan ğayrı, qırımlınıñ aytqanına köre, Rusiye SİZOsınıñ şaraitlerinde imkânsız olğan tibbiy közetüvni talap etken bir sıra hastalığı bar.
«Rusiye tahqiqatı ve mahkemesiniñ adil olğanına inanmayım. Azat olmaq ve yaqınlarına qaytmaq içün siyasiy añlaşmalar çerçivesinde olacaq deñişimden başqa bir çare körmeyim. Yaqında er bir ukrainalınıñ ayatı siziñ içün eñ büyük emiyet ola, dep aytqansıñız. Menim taqdirime de lâqayt qalmaycaqsıñız, dep ümüt etem. Buña baqıp, meni deñişim cedveline kirsetmeñizni rica etem. Qorantama da maddiy taraftan destek köstermeñizni rica etem. Yaşasın Ukraina!», – dep aytıla mektüplerde.
Yatskinniñ advokatı Nikolay Polozov Qırım.Aqiqat mühbirine izaat berip, müvekkiliniñ ricasını Ukraina prezidentiniñ ofisine bildirmek içün Kyivge keldi, dep tarif etti.
«İvan Yatskinniñ arizası eñ yaqın vaqıtta prezident Zelenskıynıñ qoluna tüşer ve o, deñiştirilecek şahıslar cedveline kirsetilir, dep ümüt etem», – dedi Polozov.
Polozov, Yatskin apiske alınğan soñ Qırımdan Moskvağa çıqarıldı, dep bildirgen edi. Onıñ aytqanına köre, Rusiye quvetçileri qırımlığa «büyük maneviy basqı» yaptı.
TASS Rusiye haber agentliginiñ bildirgenine köre, qırımlığa qarşı dava tafsilâtları «tahqiqat menfaatları içün» aydınlatılmay.
Qırım.Aqiqatnıñ Ukraina telükesizlik hızmetine yollağan muracaat cevabında İvan Yatskin UTH ile işbirligi yapmadı, dep aytıla.
