Moskovanıñ Lefortovo mahkemesi aprelniñ 17-sinde, daa dört Qırım yalısı yanında zapt etilgen ukrain arbiy adamnıñ tevqif müddetini uzattı. Azatlıq Radiosınıñ rus hızmeti bildirgeni kibi, Boğdan Ğolovaş, Serğiy Popov, Volodımır Tereşçenko, Andriy Şevçenko, Vyaçeslav Zinçenko, Denıs Ğrıtsenko, Mıhaylo Vlasük ve Andriy Draç iyülniñ 24-üne qadar SİZOda tutulacaq.
Andriy Şevçenko, mahkemege "Nastâ, hayırlı yaşlar olsun" plakatını ketirdi.
Bundan evel mahkeme, daa dört deñizci - Roman Mokrâk, Yevğen Semidotskıy, Andriy Oprısko ve Serğiy Tsıbizovnıñ tevfiq müddetini uzatqan edi.
Aprelniñ 17-sinde Moskovanıñ Lefortovo mahkemesiniñ yanında bir kişilik qoltutuv piketi keçirildi.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
