Link açıqlığı

Kiyev – Qırımnıñ «taqdirinen» bağlı «referendum» keçirilgen soñ, Qırım ükümetinde eki yıldan ziyade yolbaşçılıq yapqan mogilöv aqqında iç bir şey belli degil. Qırım Cumhuriyetiniñ Yuqarı Şurası deputatları onıñ istifası aqqında qararnı fevral 27 künü, bina rusiyeli arbiyler tarafından zapt etilgen vaqıtta qabul ettiler. 2010 senesinden başlap, yarımadanı idare etken «donetsk-makeyevka»lı nazirlerniñ episi işten çıqtılar. Qırım.Aqiqat Mogilöv ve taqım azaları qayda bulunğanı ve ne ile oğraşqanlarını ögrendi.

2010 senesi Viktor Yanukoviç Nazirler Şurası reisi vazifesine Makeyevkanıñ sabıq meri Vasiliy Cartınıñ tayinlegen soñ, Qırımda Makeyevka ve Donetsk memurları peyda oldı. Qısqa müddet içinde Cartı Qırımnıñ siyasiy alanını raqiplerden boşatıp, müim vazifelerge özüniñ adamlarını qoydı.

2011 senesiniñ yazında baş nazir vefat etti, onıñ yerine diger «makeyevkalı» Pavel Burlakov keçti. Bir qaç aydan soñ, yanukoviç Qırımğa İçki İşler Nazirliginiñ sabıq yolbaşçısı Anatoliy Mogilövni yolladı, o da, vefat etken Cartınıñ köydeşi ve siyasiy arqadaşı edi. Mogilöv, ükümette iç bir şey deñiştirmey qaldırdı, «makeyevka» ve «donetsk» vekilleriniñ aman-aman episi vazifelerinde qaldılar.

Bu seneniñ fevral ayında Qırım ükümeti ve parlamentini «yeşil adamçıqlar» zapt etken soñ, Mogilöv olarnıñ areketlerini takbih etip, muzakereler keçirmege tırştı. Amma, bunıñ episi neticesiz qaldı.

Sabıq baş nazir nefaqağa çıqıp, raatlana

Qırımdaki vaqialar boyunca soñki beyanatnı Mogilöv martnıñ 11 yaptı. «Mühbirler taqiqatı merkezine» bergen intervyüsında o, qırımlı deputatlarnıñ qararlarını teñqid etip, Ukraina Yuqarı şurası ile cumhuriyetniñ parlamentini añlaşmağa çağırdı. Bundan soñra, sabıq baş nazir tınçlanıp, artıq körünmedi.

Şimdiki vaqıtta Mogilöv Ukraina yaşay ve siyasetke qaytmaycağını bildirdi. Bunı o, Qırım.Aqiqatqa bildirdi. «Şimdiki vaqıtta men nefaqağa çıqıp, raatlanam. Mende er şey yahşı. Qırımğa tek raatlanmaq içün baracam», - dedi o.

Bunen beraber, Mogilöv Ukrainada yaşağanını bildirdi, qaysı şeerde sualine cevap bermedi. Şimdiki vaziyetke nasıl qıymet keskenini ögrenmege imkân olmadı. Qayda bulunğanını aytqan soñ, Mogilöv telefonnı qoydı ve artıq seslenmedi.

Qırımnıñ sabıq baş nazirini rusiyeli mahsus hızmetler araştıra bile. Bunı Qırım.Aqiqatqa Ukraina halq vekili, Qırım İçki İşler Nazirliginiñ sabıq yolbaşçısı Gennadiy Moskal bildirdi.

«Onı rusiyeli mahsus hızmetler qıdıra. O Qırım işğal etilecegini bile edi. Memuriy binalarnı zapt etkenlerden haberi bar edi. Anda ona radam kire edi. Kün evelden anda yataq, yemek, aşçı, silâ ketirilgen edi. Bunıñ episine Qırımnıñ sabık akimiyeti ruhset berdi. Er şey zapt etilgen soñ, o qorqıp qaçtı», – qayd etti Moskal.

Moskalniñ malümatına köre, şimdiki vaqıtta Rusiye Federatsiyası sabıq baş nazirniñ muavinleri Pavel Burlakov ve Georgiy Psarövni araştıralar. Ekisi de Makeyevkalılar. Qayda bulunğanları belli degil. Qırımnıñ yañı «akimiyetine» yaqın olğan siyasetşınas Aleksandr Formançuknıñ fikirince, Burlakovnı yarımadada yüksek vazifege tayin etilmesine imkânı bar.

«Asılında o bilgili idareci edi. Onıñ qaytmasnı men çezmeyim. Amma, akimiyetniñ ayatlarında olğan müitni bilerek, mütehassıs olaraq ayta bilem. Umumen, Donetsk ve Makeyevkalılarnı çoq alğışlamaylar. Lâkin bazıları eyi çalıştı. Bu cümleden, Burlakov ve içtimaiy siyaseti boyunca sabıq nazir Semiçastnayanı qayd eteler. Amma, olar bulunğan vazifelerge kene de iddia etecekleri imkânsızdır», – dedi siyasetşınas.

Formançuknıñ fikirince, daa bir makeyevkalı, Nazirler Şurası reisiniñ sabıq muavini Georgiy Psaröv artıq Qırımğa qaytamaycaq. Yarımadada bulunğan vaqıtta, memur topraqnen bağlı ayın-oyunlarda iştirak etip, akimiyetniñ közünden çıqtı.

Semiçastnaya dissertatsiya yaza, Lâşevskiy ise, işsiz yüre

Yelena Semiçastnaya ise, Qırımda devlet işine qaytacağını istisna etmey. Qırım.Aqiqatqa bergen malümatına köre, o yarımadada yaşay ve naizetlik dissertatsiyası üzerinde çalışa. «Namzetlik dissertatsiyamnıñ üçte bir qısımı endi azır. Onıñ mevzusı Qırımdaki içtimaiy qoruv sistemasınıñ nezaretine bağışlanğan. İşke çağırsalar, memnüniyet ile qoşulırım, men devletke hızmetinde aman-aman 20 yıl bulundım ve Qırım eyiligi içün isteknen çalışırım», – dep añlattı sabıq nazir.

Semiçastnayanıñ köydeşi naqliye ve alâqa boyunca cumhuriyet komitetiniñ sabıq reisi İvan Vanhanen de Qırımda çalışmalarnı devam etecek eken. Bunı Qırım.Aqiqatnıñ mühbirine onıñ sabıq matbuat-kâtibi Zera Emirsuin bildirdi.

«Men onıñnen mayısnıñ soñunda laf ettim. O, şimdi Qırımda bir şeyler yapacağını aytqan edi, bu aqqında ileride er kes bilecegini bildirdi. Evelden o dispetçer merkezinen oğraşqan edi, bu işni devam ettirecektir», – dedi Zera Emirsuin.

Mogilövniñ ükümetinde qurucılıq ve mimarcılıq Cumhuriyet komitetiniñ yolbaşçısı olğan daa bir Makeyevkalı Andrey Lâşevskiy Qırımda qalğanını ayttı. Qırım.Aqiqatqa: «Men Qırımdam ve şimdilik iç bir şey yapamağa niyetim yoq», –dedi.

Nahlupinni iç bir şey battırmadı

«Makeyevkalı» taqımından tek Vitaliy Nahlupin olğan vaziyetke alışıp, çalışmağa devam etti. O, ta Cartınıñ devirinde iqtisadiyat ve bücet-maliye siyaseti boyunca komissiyasınıñ yolbaşçısı ola.

Aleksandr Formançuk Nahlupin aqqında şunı ayttı: «O çalışqanı kibi çalışa. İhtiyac bar ve oña yahşı davranalar».

Qırımğa Donbasstan degil de, diger şeerlerden kelgen nazirler yarımadanı terek ettiler. Hususan, sabıq sağlıq saqlav naziri Aleksandr Kanevskiy Kiyevge qayttı. «Men tibbiyet saasında çalışam. Kiyev hastahanelerniñ birinde ekim olıp çalışam», – dedi Aleksandr Kanevskiy Qırım.Aqiqatqa.

Qırımlı olmağan sabıq nazirlerden eñ faal siyasiy ayatnı maliy nazirliginiñ sabıq reisi Nikolay skorik alıp bara. Onı, 2013 senesi işten çetleştirdiler, işğal evel o tuvğan Odessağa qayttı ve martnıñ 3 –ne qadar yerli vilâyet devlet memuriyetini idare etti. Şimdiki vaqıtta, o, Odessa vilâyet şurasında çalışa ve «Birlik» deputatlıq fraktsiyasına reislik yapa. İyün 23-den başlap, sabıq regioncı Yuriy miroşniçenkonıñ reberligindeki Ukraina inkişafı firqasınañ reis muavini vazifesinde buluna.

XS
SM
MD
LG