Ukraina Tış işler nazirligi Ukraina prezidentiniñ Qırım Muhtar Cumhuriyetindeki daimiy temsilciliginen beraber Qırımnı işğalden qurtaruv strategiyasını Milliy telükesizlik ve mudafaa şurasına yolladı.
Tış işler naziriniñ birinci muavini Emine Ceppar Yuqarı Radadaki komitet diñlevleri vaqtında bildirgenine köre, fevralniñ 26-na qadar Milliy telükesizlik ve mudafaa şurası bu vesiqanı qabul ete bile.
«Qırım platformasını» azırlamağa başlağanımızda Prezidentniñ Qırım Muhtar Cumhuriyetindeki daimiy temsilciliginen beraber işğalden qurtaruv strategiyası parçalarınıñ azırlanmasına teşebbüs kösterdik, ve ükümet ve vaqtınca işğal etilgen topraqlar nazirliginen zamandaşlaştırıp, Milliy telükesizlik ve mudafaa şurasına yolladıq. Fevralniñ 26-nda Milliy telükesizlik ve mudafaa şurasınıñ toplaşuvı olacaq ve böyle strategiya qabul etilecek, dep bekleymiz. Bu iş kete, bunı bilem», – dedi o.
Ukraina Tış işler naziri Dmıtro Kuleba intervyülardan birinde dedi ki, Qırımnı işğalden qurtaruv mevzusı Rusiye içün «ceennem» olmalı.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
