Ukraina Milliy politsiyası «normand formatındaki» muzakereler arfesinde dekabrniñ 8-nde ve 9-nda keçirilecek aktsiyalar aqqında internette bir ilân ve dört haber kördi, dep bildire müessiseniñ saytı. Berilgen malümatqa köre, numayışlarda on biñlernen kişi iştirak etecek.
«Bu aktsiyalarnıñ teşkilâtçılarınen bir sıra körüşüv keçirdik. Bir şartımız bar – qanunğa uyacaqlar. İç işler nazirliginiñ vaziyet merkezi gece-kündüz çalışa. Vaziyetni közetip, operativ qarar alacaqmız», – dep qayd etti dekabrniñ 6-nda iç işler naziriniñ birinci muavini Serğiy Yarovıy.
Onıñ aytqanına köre, yañı yıl bayramları munasebetinen Sofiyska meydanı qapatılğanı içün raatlıq künleri Hreşçatık caddesi naqliyatqa açılacaq.
Tertip-nizamnı temin etmek içün üç biñge yaqın uquq qoruyıcını celp etmege planlaştırıla.
Qırımtatar Milliy Meclisiniñ reisi Refat Çubarov Zelenskıynı Qırım mevzusını «normand formatındaki» körüşüvde kötermesine çağırdı. Qırım meselesini «normand muzakerelerinden» çıqqarmamaq çağıruvını Meclis reisiniñ muavini İlmi Umerov da aydınlattı.
«Normand formatındaki» körüşüv dekabrniñ 9-nda Parijde ötkerilmeli. Böyle muzakereler soñki sefer 2016 senesi oktâbr ayında keçirilgen edi. Ukraina prezidenti Zelenskıynıñ aytqanına köre, «norman dördü» memleketleriniñ liderleri esirlerniñ qaytuvı, ateş toqtatıluvı, Ukraina-Rusiye sıñırınıñ kontroli ve Donbastaki saylavlarnı muzakere etecekler.
