Qırımtatar Milliy Meclisiniñ reis muavini İlmi Umerov, Ukraina prezidenti Volodımır Zelenskıynı dekabrniñ 9-nda Parijde Rusiye prezidenti Vladimir Putin ile keçirecek «Normand muzakerelerinden» Qırım meselesini çıqarmamasına çağıra.
Umerov, müracaatını Facebookta aydınlattı.
«Rusiye Federatsiyası tarafından vaqtınca işğal etilgen Ukraina topraqlarınen bağlı er angi muzakerelerden Qırım mevzusı çıqarılmamalı, dep beyan etem. Qırım «qavuslardan» çıqarılmamalı. «Normand formatında» körüşüvni Qırımsız keçirmege aşıqmamaq kerek. Soñra Rusiye vekilleri ve Gazpromğa bağlı Avropa memurları Ukraina iştirak etip, «Qırım meselesini» kötermedi, demek, qanunsız ilhaqnı tanıdı, dep aytacaq», – dep tüşüne İlmi Umerov.
Meclis reisiniñ muavini, «Ukraina topraq bütünligi 2014 senesiniñ başında olğan devlet sıñırlarında ğayrıdan tiklengenine, Rusiye askerleri ve arbiy birleşmeleri Ukrainadan çıqarılğanına qadar Rusiyege qarşı sanktsiyalar quvetleştirmeli», dep qoştı.
Umerov, Zelenskıynı Ukraina Yuqarı Radasınıñ kün tertibine üç qanun leyhasını kirsetmesine çağıra: «Tamır halqlar qanunı», «Qırımtatar halqınıñ statusına dair qanun», «Ukraina Anayasasınıñ 10-uncı maddesine kirsetilecek deñişmeler qanunı».
«Qırımtatar halqınıñ aqlarını yerine ketirecek qanunlarnıñ qabul etilüvi Ukrainanıñ areketleri cemiyetniñ demokratizatsiyası ve adaletke ıntılmasına yönelgenini tasdıqlaycaq», – dep qoştı Umerov.
Daa evel Qırımtatar Milliy Meclisiniñ reisi Refat Çubarov, Zelenskıynı Qırım meselesini dekabrniñ 9-nda keçirilecek «normand formatı» körüşüvinde kötermesine çağırdı.
Ukraina prezidenti Volodımır Zelenskıy Qırım.Aqiqatqa intervyü berip, «Qırım içün «Ştaynmayyer formulası yoq» ve halqara ortaqlar olmasa, yarımadanı işğalden qurtarmaq imkânsız olacaq, dedi.
«Normand formatındaki» körüşüv dekabrniñ 9-nda Parijde ötkerilmeli. Böyle muzakereler soñki sefer 2016 senesi oktâbr ayında keçirilgen edi. Ukraina prezidenti Zelenskıynıñ aytqanına köre, «norman dördü» memleketleriniñ liderleri esirlerniñ qaytuvı, ateş toqtatıluvı, Ukraina-Rusiye sıñırınıñ kontroli ve Donbastaki saylavlarnı muzakere etecekler.
