Cuma künü, martnıñ 13-ünde Qırımda qırımtatar faali, iş adamı Mustafa Osmanov keçindi. O 65 yaşında edi. Qırım.Aqiqat bir yıl evel Osmanovnıñ 2014 senesi mayıs 3-ünde olğan vaqialar aqqında ikâyesini derc etti. O vaqıt biñlerce qırımtatarlar "Armânsk" kiriş-çıqış noqtasına milliy yetekçi Mustafa Cemilevni qarşılamaq içün bardı. O kün Cemilev, rusiye akimiyeti oña kirişni yasaq etkeninden soñ, ilhaq etilgen Qırımğa yol aldı. Faallerniñ kolonnaları Rusiye spetsnazınıñ "canlı qalqan"nından keçip, kiriş-çıqış noqtasına cayav ketti. Anda adamlar Mustafa ağanen körüşti, amma onı Qırımğa yibermediler ve o Kyivge qaytmağa mecbur oldı.
Dünyanıñ temeli küç degil, aqiqattırMustafa Osmanov
İş adamı ve yarımadada bir qaç tükânnıñ saibi Mustafa Osmanov o vaqialarda qadını Zera ve oğlu Edem ile iştirak etti. Keççe Rusiye quvetçileri Osmanovnıñ evinde tintüv keçirdi. 2015 senesi yanvarde ise oğlu Edemni tevqif ettiler. O vaqıt onı Rusiye Cinaiy Kodeksiniñ 318 maddesiniñ 1-ini qısmına ("akimiyet vekiline qarşı küç qullanması") binaen qabaatladılar. "Mayısnıñ 3-ünde oğlum ögde kete edi ve rusiye quvetçilerinden birisi onıñ ögünde yıqıldı. Ve mahkemede bunı, sanki Edem onı urdı dep kösterdiler", - añlata edi Osmanov.
Mustafa ağa bıltırki intervyüsini böyle yekünledi: "Yüz fayız aqlı olğanımnı bile edim, alâ bugün öyle sayam. Bundan da ğayrı, aqlı olğanımnı tasdıqlamaq içün bütün areketlerimni tekrar yapar edim. Çünki dünyanıñ temeli küç degil, aqiqattır", - dedi o.
Qırım.Aqiqat dostları ve tanışlarınıñ onıñ aqqında hatırlavlarını topladı. Olar Osmanovnıñ türlü yaşayış qısımlarına ait, amma episi sözlerini tasdılay: Mustafa ağa aqiqat içün soñunace küreşe edi.
O maña ayta edi ki, atta buldozernen evni bozmağa ıntıla ediler, zorbalıqnen eşyasını toplap, Özbekistanğa yollay edilerValentın But
Ukrain yazıcı Valentın But Mustafa Osmanovnıñ oğlu Edem oquğan sınıfta inglis tili derslerini bere edi. Em de yazıcı Aqmesçit rayonınıñ (Çernomorskiy) Yarılğaç (Mejvodnoye) qasabasında yaşap, Osmanovnıñ köydeşi ola. O ikâye ete ki, Osmanov sürgünlikten qaytmağa ıntılğanda, onı eki kere kene Qırımdan çıqarmağa tırıştılar, bayağı vaqıt resmiy qayd etmediler: "Bu pek çirkin bir ikâyedir. O maña ayta edi ki, atta buldozernen evni bozmağa ıntıla ediler, zorbalıqnen eşyasını toplap, Özbekistanğa yollay ediler. Asıl, o pek israrlı bir adam edi. Er vaqıt memleketiniñ akimiyetke degil, adamlarğa lâyıq yapmağa tırışa edi". Köydeşi, Mustafa Osmanovnen bir qaç kere Kyivge Maydanğa barğanlarını tarif ete.
Qırımdan qazanlar-erzaqlarnı ketirip, meydanda narazılıq iştirakçileri içün pilâv pişire ediErfan Kudusov
Qırımtatar kafesiniñ saibi Erfan Kudusov, faal Osmanovnen Kyivde tanışqanını aytıp bere. Bu dekabrde edi, dey. Mustafa Osmanovnıñ çadırında qırımtatar bayrağı yelpirey edi. "Aqlımda bar, yanıma birev keldi de, anda vatandaşım kerçek qırımtatar pilâvını pişirgenini ayttı. Barıp baqsam, aşpaz Mustafa Osmanov edi eken. Qırımdan qazanlar-erzaqlarnı ketirip, meydanda narazılıq iştirakçileri içün pilâv pişire edi".
Kudusov, Osmanovnıñ çadırı yanında sıcaq aş istegenler bir sırağa tizilgenini hatırlay. "Mek pek yahşı hatırladım ki, o vaqıt onen üç qadın bar edi: bir qırımtatar ve eki ukrain. Olar öyle şeñ, quvançlı edi. Asıl, o yalıñız itibarlı degil de, çevresinde şeñ ve parlaq adamlarnı toplağan adamğa oşadı". Erfan, onı Mustaqillik Meydanında daa üç kere körgenini ayta, Mustafa Osmanov Qırımğa qaytqan soñ ise, olar kimerde Facebookta qonuşa edi.
Faal Elmaz Qırımlı Mustafa ağanıñ ölümi aqqında Kyivde olğanda bilgenini ayta. "Kerçekten aytsam, biz yaqında tanıştıq: bir kere musafirlikke kirdik. O bizge Maydanda pilâv pişirgenini, Kyivge qazanlarnı alıp ketkenini aytıp bere edi. Cenazesine barıp olamağanıma yazıqsınam. Qadını Zera tatağa qol tutıp olamadım. Olarnıñ qorantası pek hoş ve sıcaq. Mustafa ağanıñ özü ise - adalet içün aqiqiy küreşçi edi".
Onda öz qorantası içün ve bir parçası olğan halqımız içün er şeyni keliştirmek ve yapmaq niyetleri birleşe ediRefat Çubarov
Qırımtatar Milliy Meclisiniñ reisi Refat Çubarov Mustafa Osmanovnen soñki sefer 2015 yılda Anqarada Bütündünya qırımtatar kongressinde soñki sefer körüşti. "O qırımtatar areketinde böyle meşur bir şahıs edi. Onı milliy areketniñ biñlernen köçüricilerinden birisi edi, dep tasvir eter edim. Men onı 90-ıncı yıllarnıñ başından tanıy edim. Bir qaç kere musafiri olğan edim ve onda öz qorantası içün ve bir parçası olğan halqımız içün er şeyni keliştirmek ve yapmaq niyetleri birleşe, dep körüngen edi".
