Qırımdaki Rusiye akimiyeti baar ayazları sebebinden bereketni sigortalamağa teklif ete. Bunı fermerlerge Kreml nezaretindeki Qırım köy hocalığı naziri Andrey Rümşin teklif etti, bundan ğayrı o, bu meselede devlet desteginiñ alınması protsedurasınıñ aprelniñ 15-inece keçmek mümkün olğanını qayd ete.
Qırım Köy Hocalığı Nazirliginiñ malümatına köre, baar ayazları neticesinde martta ve aprelniñ başında Canköy, İslâm Terek, Qurman, Yañı Qapı, Yedi Quyu, Aqşeyh, Seyitler, Aqmeçit rayonlarında şeftali, kiraz, vişne, erik, qaysı, alma tereklerinde çiçekler ve meyva gönceleri zarar kördi. Qış ekinlerniñ 29%-ı zayıf ve siyrektir. Qırım fermerlerini ne bekleycegi aqqında Qırım.Aqiqat Radiosı efirinde muzakere etildi.
Qırım köy hocalığı ilmiy tetqiqat institutınıñ müdir müavini, köy hocalığı ilimleriniñ kandidatı Lüdmila Radçenko "Sputnik v Krımu" radiosınıñ efirinde şimdiki ayazlarda beklenilmegen bir şey olmadı, dep ayta:
"Baarde biz sıq-sıq bu devirde ayazlarnı köremiz, hususan deyerli qış olmağanda - er kes qış martta ya da aprelde başlaycağını bekley. Mayısta sıfırdan aşağı ava araretimiz olğan yıllarımız da oldı, boğday ve arpa qazanlanıp başlağanda - asıl bir deşet edi. Bu yıl ilk ayazlardan soñ qış arpası ve boğdayı ölgenine er kes birden şaştı. Kerçekten, bu yınıñ şaraitleri sıradan tıştır: aşağı ava arareti olağanından sebep ösümlik bütün qış inkişaf etti... Bir vaqıtlar qış arpasını yetiştirgenimiz zaman, baar ayazlarına dayanıp olacaq türlerni saylay edik. Böylece, ayazlarğa dayanacaq bir qaç çeşitimiz bar edi, olarnı keçirdik, amma, yazıq ki, bereketlerine köre, olar zayıfca oldı. Ancaq şimdi selektsiyamıznıñ çeşitleri - "Omega", "Buran", "Ogonkovskiy" - bu ayazlarğa dayandı".
Bağçasaray rayonındaki fermer Arif Osmanov martnıñ başında meyva bereketi aqqında belli olmağan tahminler aqqında Qırım.Aqiqatnen paylaştı. Bugün o vaziyet yaramaylaşqanı aqqında ayta.
Başqa bahçevanlarnıñ qaydı, badem, erik ve vişneleri buzlap ketti. Şeftali - daa belli degil, belki 20-30%-ı qalır.Arif Osmanov
- Bu saba -3 edi, biz tütün perdelerini yapa edik. Keçken subetimizde kibi, şeftali olacaqmı sualine cevaplanıp olamayım. Bağça gülley, amma bir çoq gönce uruldı, olar qaralar. Başqalarıayazlarğa dayandı. Tahminen aprelniñ soñunda daa doğrusını aytmaq mümkün olur, amma bizde mayısta da suvuq ura bile. Onıñ içün sadece mayısnıñ ortasında belli olacaq. Üç derecege qadar suvuq olsa, tañ ağarğanda tütün perdesini yapmaq kerek. Ondan da suvuq olsa - çeçeklerni qurtarmağa çare yoq. Başqa bahçevanlarnıñ qaydı, badem, erik ve vişneleri buzlap ketti. Şeftali - daa belli degil, belki 20-30%-ı qalır. Alma ve armut olacaq. Teklif etilgen sigortaga barğanda, olarğa iç muracaat etmedim, öz küçümnen becermege tırışam.
"Agrariy sigortacılarnıñ milliy birligi" bütünrusiye birleşmesi ilhaq etilgen Qırımda da öz sigorta programmalarını teklif ete. Devlet desteginiñ kösterilmesi programmasına köre, fermacı sigorta irketini saylay, añlaşmanı tize ve sigorta mukâfatınıñ 50%-ını töley. Añlaşma amelge keçkeninden soñ istisalcı destek alınması içün vesiqalarnı tapşıra.
Qarar müsbet olsa, fermacığa bölge ve federal büdjetinden mükâfatnıñ qalğan 50%-ı tölene. "Agrariy sigortacılarnıñ milliy birligi" bütünrusiye birleşmesiniñ malümatına köre, Qırımda şimdi qış arpa-boğdayınıñ sadece 4%-ı sigortalandı. "Argumentı nedeli - Krım" matbuatı öz maqalesinde, "iş adamları iqtisadiy vaziyet nasıl ilerleycegini bilmeyip, sigortağa nafile tölemege istemey", dep yazalar.
Rusiye agrar strategi Vladimir Resetnâk, koronavirus pandemiyası sebebinden peyda ola bilecek qoşma problemalarğa işaret ete.
- Fermacılar özüni tecrit etip olamay, çünki o zaman pandemiyağa daa açlıq qoşulır. Qazançtan ve çetelden qaytqan bir sürü adam olarnıñ alını daa qıyınlaştıra. Mence, neticede esas risk yedek parçalarınıñ teminatında olmaq mümkün: ekin ve cıyuv kampaniyaları vaqtında tehnikanıñ saat kibi çalışması kerek. Karantin şaraitinde urluq ve yaqıt teminatınıñ yolunı tapmaq mümkün, amma çoqusınıñ tehnikası çetelden. Avropa ve AQŞ şimdi koronavirus tarqalmasınıñ ocaqları oldı, şirketlerniñ çoqusı qapaldı. Fermacılarnı er vaqıt bir yıl aşatqanı içün, yedek parçalarınıñ satın alınması kerçek mesele olmaq mümkün. Mence, tek ava şaraiti adamlarnıñ erzaq teminatında problema olmaz.
(Metinniñ Vladislav Lentsev azırladı)
