Rusiye prezidenti Vladimir Putin ve Almaniya kantsleri Angela Merkel yanvarniñ 11-nde Rusiyede körüşecekler, dep bildire Kremlniñ matbuat hızmeti.
Olar «2015 senesiniñ Minsk «Tedbirler kompleksini» ve 2019 senesi dekabrniñ 9-nda «normand formatı» sammitinde tizilgen añlaşmalarnı yerine ketirüv çerçivesinde» Donbastaki silâlı zıddiyetni al etüv meselesini laf etmege azırlanalar, dep haber ete Azatlıq Radiosı.
Merkel ve Putin İran generalı Kasem Suleymaniniñ öldürilüvi ve Suriye ve Libiya vaziyetinden soñ Yaqın Şarq buhranını da muzakere etmege planlaştıralar.
Almaniya kantsleriniñ saytı Merkelniñ yanvarniñ 11-nde Moskvağa baracağını tasdıqladı.
Parijde dekabrniñ 9-nda aqşam Ukraina, Rusiye, Frenkistan ve Almaniya liderleriniñ körüşüvi olıp keçti. Ukraina prezidenti Frenkistan prezidenti Emmanuel Macron, Almaniya kantsleri Angela Merkel ve Rusiye prezidenti Vladimir Putin ile eki taraflı körüşüvler keçirdi.
Ukraina prezidenti, Parijde keçirilgen «normand formatı» körüşüvinden soñ keçirilgen matbuat konferentsiyasında çıqışta bulunıp, Ukraina ve onıñ halqı içün deñişmeycek esaslarnı qayd etti. O, Donbas, Rusiye işğal etken Qırım Ukraina toprağı ola, dep qayd etti.
Zelenskıy, Rusiye zenaatdaşı Vladimir Putinnen Qırım meselesini laf etmege azırlanğanını bildirdi, amma eki taraflı körüşüvde buña sıra kelmedi.
