Link açıqlığı

Saatnıñ esas haberi

"Meni mında öldüreler, men mından sağ çıqmam". Rusiye apishanesinde Oleg Prıhodko ile ne ola


Oleg Prıhodko, kollaj
Oleg Prıhodko, kollaj

Qırımlı siyasiy mabüs, Ukraina tarafdarı faal Oleg Prıhodkonı Rusiye cezahanesinde "yavaş-yavaş öldüreler" - bunı qızı Natalya Şvetsova bildirdi. Çoq vaqıt devamında Şvetsova babasınen körüşmegen ve niayet yanvarnıñ 18-nde Qırım sakininiñ tutulğan Rusiyeniñ Vladimirsk vilâyetindeki Vladimirskiy tsentral apishanesinde onıñ ile körüşip olğan.

Rusiye apishanesinde Oleg Prıhodko ile ne ola? Ukraina Yuqarı Radasınıñ insan aqları vekâletlisi bu vaziyetke nasıl qarşılıq köstere? Rusiye tahqiqatına Prıhodkonı sorğularğa çekip, arbiy areketlerde iştirak etkenini itiraf etkeni nege kerek? Bu ve diger aktual mevzular Qırım.Aqiqat Radiosınıñ yaynında.

Vladimirskiy tsentral apishanesinde babasını ziyaret etmezden evel Natalya Şvetsova onı yalıñız 2021 senesi baarde üküm elân etilgen zaman körgen. Bunı Şvetsova Qırım.Aqiqatqa bildirdi. Onıñ sözlerine köre, tuvğanları oña bir qaç mektüp yollağanlar, amma cevap kelmegen. Soñra belli oldı ki, Prıhodko şu mektüplerni almağan bile.

Yanvarnıñ 18-nde babasınen körüşken soñ Şvetsova baquv şaraiti aqqında yañı tafsilâtlar aytıp berdi.

Onı pek qıynağanlar, eki kün qollarını büklü tutmağa mecbur etkenler, üstüne suv tökkenler ve arbiy uruşlarda iştirak etkenini itiraf ettirecek olğanlar

"Körüşüvden soñ yaramay tesir qaldı, çünki babamnı pek acınıqlı bir alda kördik. Pek yaramay köründi. Tamamınen şişken edi. Keçken yılnıñ iyün ayından berli ilâclar berilmegenini ayttı. Etap vaqtında aqtarma cezahanesinde bulunğan, anda onı pek qıynağanlar, eki kün qollarını büklü tutmağa mecbur etkenler, üstüne suv tökkenler ve arbiy uruşlarda iştirak etkenini itiraf ettirecek olğanlar. O buña razı olmağan ve onı yahşı etip köteklegenler. Tibbiyet bölüginde, çöküp oturıp yuqlap qalğanı içün (bu ise yasaq) beş künge ceza izolâtorına yollağanlar", - dedi Şvetsova.

Onıñ sözlerine köre, Oleg Prıhodkonıñ sağlığı ile bağlı ciddiy problemaları bar eken, amma oña tibbiy yardım iç köstermey ekenler.

Babasınıñ sözleri: "Meni mında öldüreler, men mından sağ çıqmam, meni bir qutuğa kömerler, ne yerde kömgenlerini bile bilmezsiñiz".

Qırım.Aqiqat. Prıhodkonıñ sağlığı aqqında malümat almaq içün Rusiye FSİN-ne muracaat etti.

Bundan ğayrı, Şvetsovanıñ bildirgenine köre, Oleg Prıhodkoğa qarşı "FSB hadimini aqaretlegeni" içün yañı cinayet davası açılğan.

"Prokuror babam içün 11 yıl istegen edi, şunıñ içün beş yılnı az dep saya", - dedi o.

«Конкретно хотят посадить»: обыск и арест Олега Приходько (видео)
Bekleñiz, lütfen

No media source currently available

0:00 0:05:27 0:00

Ukraina Yuqarı Radasınıñ insan aqları vekâletlisi Lüdmila Denisova Oleg Prıhodkonıñ qızınıñ babasınıñ iskencelerge oğratılması ile bağlı haberine cevap berdi.

"Aman-aman yarım yıl devamında Vladimir şeeriniñ (Rusiye) FKU E-2 apishanesinde tutulğan ukrain siyasiy mabüsine asla tibbiy yardım kösterilmedi ve tuvğanlarınıñ yollağan ilâcaları da berilmedi. Tüzetüv müessiseniñ müdiriyeti BMT-niñ İqtisadiy ve içtimaiy şurası tarafından tasdıqlanğan 30.08.1955 tarihlı Mabüslerge munasebetniñ minimum standart qaideleriniñ 22-nci maddesinde közde tutulğan kerekli tibbiy yardım almaq içün aqnı temin etmey", - ded yazdı Denisova.

Bu sebepten, o, Rusiye ombudsmeni Tatyana Moskalkovağa muracaat etti ve "Ukraina vatandaşlarınıñ aqlarını qorçalamağa, hususan kerekli tibbiy yardım köstermege" talap etti.

Denisova dünya toplulığını "Qırımdaki bütün esirlerniñ mümkün qadar tez evge qaytarmaq ve ukrain yarımadasında adiy adamlarnıñ taqibini toqtatmaq içün küçlerini birleştirmege ve tecavuzcı memleketke tazyıqnı arttırmağa" çağırdı.

Ukraina Yuqarı Radasınıñ insan aqları vekâletlisi Lüdmila Denisova
Ukraina Yuqarı Radasınıñ insan aqları vekâletlisi Lüdmila Denisova

Denisova Qırım.Aqiqat Radiosınıñ yaynında Rusiyede "Rusiye vatandaşı" sayğanları sebebinden Rusiye ombusmanı Tatyana Moskalkovadan onıñ sağlığı ili bağlı kerçek malümat ala bilemegenini bildirdi.

"Oleg Prıhodko ile bağlı Tatyana Moskalkovağa muracaat etkenim birinci kere degil. Endi defalarca alğanımız cevapnı bekleymiz. Sözü-sözüne böyle yazılacaq: "Rusiye vatandaşı Oleg Prıhodkoğa köstergen diqqatıñız içün sağ oluñız". Olar onı Rusiye vatandaşı sayalar, bunıñ içün sağlığınıñ vaziyetini tasdıqlağan ya da red etken malümat bermeyler", - dedi Denisova.

İhtimal ki, Moskalkovanıñ cevabında Oleg Prıhodkonıñ baquv şaraitiniñ ve tibbiy teminatınıñ "Rusiyeniñ ameldeki qanunlarına ve halkhara standartlarğa uyğun olğanı" yazılacaq, dep qoştı Denisova.

Bundan ğayrı, Denisova, "Ukrainanıñ bütün vatandaşlarınıñ şartsız keri qaytarılmasını ve yüz bergen qılınuvlarnı, şu cümleden Oleg Prıhodkonıñ iskencelerge oğratılmasını toqtatmağa" talap etti.

Lüdmila Denisova yañı sorğular aqqında malümatnı da tefsir etti: "Bu, bu insannı yoq etmek ve yapmağan suçunı itiraf etip boynuna almağa mecbur etmek içün qullanğan yañı tazyıq mehanizmidir".

O, evel Rusiye ukrain siyasiy mabüsleri Stanislav Klıh ve Nikolay Karpükni de arbiy uruşlarda iştirak etkeninde qabaatlağanını hatırlay.

Ukrain siyasiy mabüsi Nikolay Karpük Vladimireskiy tsentral apishanesinde eki yıl ve yedi ay tutuldı. "Baquv şaraiti pek qattı, anda aman-aman er şey yasaq, körüşüvler tek kimrde mümkün. Buña baqmadan, o zaman maña qarşı böyle qanunsızlıq olmadı. Amma 2019 senesi cezahaneniñ müdiriyeti deñişti", - dey Karpük.

Sabıq ukrain siyasiy mabüsi Nikolay Karpük
Sabıq ukrain siyasiy mabüsi Nikolay Karpük

Prıhodkoğa qarşı açılğan yañı cinayet davasını tefsir etken Karpük, bunıñ sebebini, ukrain faaliniñ boysunmamağanı olğanını saya.

2021 senesi Rostov-na-Donudaki Cenübiy arbiy bölgesiniñ mahkemesi Qırımdan ukrain tarafdarı faali Oleg Prıhodkonı terror ücümini azırlağanında ve patlayıcı maddelerni qanunsız yapqanında qabaatlı tanıdı ve 5 yıl sert apis cezasına mahküm etti.

Ukraina Yuqarı Radasınıñ insan aqları vekâletlisi Lüdmila Denisova Qırım sakini, ukrain tarafdarı faali Oleg Prıhodkoğa çıqarılğan ükümni takbih etti.

Ukraina Tış işler nazirligi, Cenübiy arbiy bölgesiniñ mahkemesi Oleg Prıhodkonı terror ücümini azırlağanında ve patlayıcı maddelerni qanunsız yapqanında qabaatlı tanıp, 5 yıl sert apis cezasına mahküm etkenine narazılıq bildirdi.

Qırımda Ukraina prezidentiniñ daimiy temsilcisi Anton Körineviç Rostov-na-Donudaki Cenübiy arbiy bölgesiniñ mahkemesi Qırımdan ukrain tarafdarı faali Oleg Prıhodkoğa çıqarğan ükümni takbih etti.

2019 senesi fevralniñ 8-nde Qırımdaki FSB idaresiniñ hadimleri Oleg Prıhodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekkenler.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG