Qırımnı Ukrayinanıñ nezaretine qaytarmaq içün Kıyivni mudafaa etken Arsen Jumadilov Rusiyeniñ keñiş mıqyaslı arbiy istilâsı arbiy işğali zamanı Ukrayina Silâlı quvetlerinde hızmet etmek içün şahsiy motivatsiyasını böyle añlata. Üç aliy tasil ile Qırımlı, memur, iç bir vaqıt arbiy tecribesi olmağan memur şimdi arbiy cebede kerek olğanı qararına keldi.
Bu ikâenen Qırım.Aqiqat Ukrayinanı Rusiye tecavuzından silânen qoruğan qırımlılar aqqında maqalelerni devam ete.
Aqmescitli cemiyetçi ve siyasetçi Arsen Jumadilov cenkten evel Ukrayinada muvafaqiyetli karyera qura edi. Rusiye Qırımnı işğal etmezden evel tetqiqiy faaliyet ile oğraşa edi - "Qırım strategik araştırmalar institutı" cemaat teşkilâtınıñ koordinatorlarından biri edi ve çetel ticariy qurulışlar ile işbirlik ete edi.
Yarımadanıñ Rusiye tarafından işğali sebebinden Ukrayinanıñ qıtasına mecburiy köçmesinden soñ 2014 senesi qırımtatar halqınıñ aqları üzre Prezident yanında vekâletliniñ faaliyetiniñ temin etilmesi bölügine reberlik etti ve qırımtatar halqınıñ statusı aqqında Ukrayina Anayasasına deñişmeler kirsetilmesinde faal iştirak etti. Kıyiv-Mogıla akademiyasında dersler bere edi.
Bir yıldan soñ Odesa vilâyetindeki Belâyev rayon devlet memuriyetine reberlik etti. Soñra Odesa vilâyetiniñ reber muavini olıp çalıştı.
Soñki üç yıl devamında o, memleketniñ eñ büyük alıcılarından biri olğan "Ukrayinanıñ tibbiy satın aluvlar" devlet müessisesiniñ reberi oldı.
Arsen Jumadilovnıñ arbiy tecribesi yoq. Şimdi onı arbiy vaziyette ala. Buña baqmadan, o, özüni arbiy cebede Ukrayina içün eñ faydalı saya. Martnıñ başından, o, Rusiye ordusı toqtamadan ücüm etken Kıyiv noqtalarında tura. Martnıñ 18-nde Ukrayina Silâlı quvetlerine yemin etti.
Kıyivde arbiy nevbetçilik vaqtında Arsen Jumadilov böyle neticege keldi: 2014 senesi Rusiye Qırımnı işğal etken soñ ve şimdiki Rusiyeniñ Ukrayinağa qarşı cenki sebebinden qırımtatarlarda "hususan erkeklerde, kelecek sefer imperiyanıñ ambitsiyaları keskinleşkende işğalciler içün qolay ğanimet olmamaq içün, Qırımnı işğal etmek qıyın olması içün mıtlaqa silâla olmalı". Bunı o Facebook saifesinde yazdı.
"Evde qalmaq saylav degil. Men hızmet etmege qarar ettim"
"Birincide, şimdi arbiy qurulışlarğa mümkün qadar çoq insan kerek. İlk-evelâ söz silâ tutmaq ve onı qullanmaq becerikligi aqqındadır. Bundan ğayrı logistika, satın aluv, kommunikatsiya ve diger saalarda işni teşkil etmege bilmektir. Şimdi daa çoq cebede faydalı olacağımnı añladım. Ekincide, men Qırımdanım. 2014 senesi Rusiye onı işğal etkende anda edim", - dedi o.
Arsen Jumadilov faallernen beraber 2014 senesi yarımadanıñ Rusiye tarafından ilhaqına qarşı zorbalıqsız tirenüv aqqında hatırlay. Amma bu küreş, onıñ fikrince, "neticesiz" edi, çünki Qırım episi bir Rusiye tarafından işğal etildi.
Şimdi Rusiye Ukrayinağa qarşı keñiş mıqyaslı cenkni başlağanda, o, memleketni silânen imaye etecegine qarar berdi.
Ögüme işğalci çıqça legal olaraq silâ olmasını ve legal olaraq onı qullanmağa isteyim
"Men artıq işğalci ile silâsız qarşılaşmağa istemeyim. Ögüme işğalci çıqsa onıñ insafına, insaniyetliligine işanmağa istemeyim. İşğalciler silâsız adamlarnı qırsızlay ve öldüre, suçsuz adamlarnı uzun müddetke apishanelerge ata. Ögüme işğalci çıqça legal olaraq silâ olmasını ve legal olaraq onı qullanmağa isteyim. Men Qırımdanım. Bir kere vaziyetten sebep andan kettim. Daa bir kete ketmeycegim. Kıyiv menim ekinci evim. Mında menim eki qızım doğdı, mında apayımnen sekiz yıl yaşadıq. Kıyivden ketmecegimni bile edim. Kıyide qalıp sen ya da göñülli olaraq bir şeyler yapasıñ, ya da hızmet etesiñ. Evde qalmaq saylav degil. Men hızmet etmege qarar ettim", - dedi Jumadilov.
"Menim maqsadım tuvğan toprağımda yaşamaqtır"
Arsen Jumadilov Qırımnıñ işğalden azat etilmesini yaqınlaştırmaq ümüdi ile Ukrayina Silâ Quvetlerinde hızmet etmek qararına keldi.
Mustaqil suveren Ukrayina işğalden azat etilgen Qırımnıñ kefaletidir
"Mustaqil suveren Ukrayina işğalden azat etilgen Qırımnıñ kefaletidir. Azat Ukrayina olsa, azat Qırım da bar. Ertemi, keçmi, biz tüşüngenimizden ve Kremlniñ istegeninden daa tez olur. Qırımtatar olaraq, menim maqsadım Vatanımda onıñ oğlu kibi yaşamaqtır. Ukrayinanı imaye etip, bu maqsadıma yolunda adım atam", - dep añlata o.
Jumadilovnıñ fikrince, Ukrayina ile cenk vaqtında Rusiye "eski imperiya tipli devlet qurulışı kibi yoq olayata". Onıñ yerine ise "yañı, zemaneviy ekspansiya ile oğraşqan degil, kendini inkişaf ettirecek ve vatandaşları içün yahşı şarait yaratacaq kerçek milliy devlet kelecigini" tüşüne.
Ukrayina vatandaşalrına Arsen Jumadilov "öz qaramaniy ve efsaneviy yolunda ilham" tiley.
"Özüñizge ve balalarıñızğa muqayt oluñız, olar daa bu güzel memleketni ğayrıdan tikleycekler. Qırımtatarlar, biz bar edik, barmız ve olacaqmız. İnşallah, tezden öz topraqlarımızda bizim Qırım yuvamıznı tikleycekmiz", - dedi o.
Arsen Jumadilovnı cenkten apayı ve eki qızı, ana-babası ve ağası bekleyler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
