Rusiye uquq qoruyıcı organlarınıñ hadimleri tarafından işkencege oğratılğanını tarif etken saqlı 11-inci sınıf talebesi Server Rasilçaknıñ anası Lilâ Rasilçak davanen bağlı tahqiqat sozulğanı içün Rusiye prezidenti Vladimir Putinge açıq mektüp yazdı.
Qırım.Aqiqatnıñ elinde olğan mektüp kopiyasında qadın, qorantası adisege alâqası olğan politsiya hadimlerine qarşı iş teşkerüvi keçirilgenine dair İç işler nazirliginden alâ daa haber almağanını qayd ete.
«Bu cinaiy davanen bağlı ilk tahqiqat bugünge qadar yekünlenmedi ve Saq rayonı prokurorınıñ qabaatlayıcı qararı mahkemege berilmedi. Cinaiy dava açılğanından berli eki aydan ziyade keçti. İşbu cinaiy dava çerçivesinde Saq politsiyasınıñ hadimlerinden iç birisine qabaatı bildirilmedi», – dep qayd etile mektüpte.
Gençniñ anası bu dava «cinayet olmağanı içün» toqtatıla bile, dep ayta. Qadınnıñ mektüpte yazğanına köre, qorantası tahqiqat organlarınıñ hadimleri tarafından muntazam sürette qorquzıla, böyle hulâsalarnıñ sebebi bu oldı.
«Tahqiqatçı balama maneviy basqı yapa, telefonda onı poligrafta teşkerüvden keçmege zorlay. Bu qorquzuv sebebinden çağına yetmegen oğlum Server poligraftan keçmege razı olmadı, çünki politsiya hadimleriniñ oña qarşı cinayet işlegenleri aqqında malümatına inanmağanlarını köre», – dep qayd ete qadın ve «Rusiyede adalet olmağanını ve adalet ümütleri boş olğanını» ayta.
«Şunıñ içün sizge muracaat etem, çağına yetmegen Server Rasilçaknıñ şartname aqlarını qorçalamaq ve onı elektroşokernen işkencege oğratqan politsiya hadimlerini cinaiy mesüliyetke çekmek içün iç olmağanda memleketniñ prezidenti Qırımnıñ savsaq uquq qoruyıcılarına «yerlerini köstersin», – dep muracaat etti qırımlı Putinge.
İşğal altındaki Qırımnıñ Rusiye uquq qoruyıcı organları Qırım.Aqiqatta 17 yaşında Server Rasilçak ve babası Enver Rasilçaknıñ işkencege oğratılğanına dair derc etilgen eksklüziv malümatnı teşkerip başlağan edi.
Server Rasilçaknıñ aytqanına köre, yanvarniñ 28-ne keçer gecesi o, babası, dostu ve qız arqadaşınen beraber maşinanen Aqmescitke ketti. Saqtaki zapravkada olarnı politsiya hadimleri toqtattı, adiy urbada olğanlar bar edi, «maşinadan aytıp», bölükke alıp ketkenler. Rasilçak, uquq qoruyıcı organlarınıñ hadimi onı qasıqqa urdı, dep ayta.
Gençniñ aytqanına köre, İç işler nazirliginiñ «Sakskiy» bölüginiñ odasında üç politsiya hadimi Serverge bunıñ sebeplerini «tüşünmege» teklik etti, soñra Rasilçaktan maşina yuvucısından para hırsızlağanını tanımasını talap ettiler. Onı elektroşokernen ve qollarnen urıp, millet mensüpliginden sebep de aqaretlegenler.
Servernen beraber maşinada olğan aydavcınıñ qız arqadaşını aydavcı şeadetnamesinden marum etecekler, dep qorquzğanlar.
Qırım.Aqiqat jurnalistleri internet ağındaki mahsus servisler yardımınen fevral ayınıñ başında qırımlı mektep talebesi Server Rasilçaknı köteklegeninden şübheli olğan politsiya hadimleriniñ kimliklerini bildi. Rasilçak, 2016 senesi Saq belediyelerara politsiya bölügi ögünde çekilgen ve yerli matbuatta derc etilgen fotoresimde politsiya hadimlerini tanıdı.
Bular şeerniñ cinaiy qıdıruv yolbaşçısı, mayor (2019 senesiniñ soñuna qadar – QA) Aleksandr Posidaylo, muavini, mayor (2019 senesiniñ soñuna qadar – QA) Dmitriy Kovin, ve operativ vekâletli, kapitan (2017 senesiniñ ortasında – QA) Nikolay Juylov ola. Qırım.Aqiqat Juylovnıñ cep telefonı nomerasını tapıp, bağlanmağa tırıştı, amma politsiya hadimi muarririyetimizge cevap bermedi.
Rusiye İç işler nazirliginiñ «Sakskiy» belediyelerara bölüginde vaziyetni resmiy şekilde izaatlamaylar.
Qırım Muhtar Cumhuriyetiniñ Prokuraturası, qırımlı gençniñ Qırım.Aqiqatqa bergen malümatınen bağlı cinaiy tahqiqat başlatqan edi.
