Qırımtatar Milliy Meclisi Ukraina Nazirler Şurasına muracaat etip, mayısnıñ 18-ne, Qırımtatar halqı genotsidiniñ qurbanlarını añma kününe, Kyivde ve degir şeerlerde keçirilmesi planlaştırılğan kütleviy eglenceli tedbirlerge qarşı acele tedbir almasını talap etti. Bu aqta Meclis reisi Refat Çubarov mayısnıñ 13-nde Facebookta yazdı.
Onıñ qayd etkenine köre, bu sene mayısnıñ 18-ne, qırımtatar halqı genotsidiniñ 75 yılına, er yıl mayısnıñ üçünci cumaertesi künü qayd etilgen Avropa Künü rastkele.
«Mayısnıñ 18-nde (cumaertesi künü) kütleviy ve büyük eglenceli tedbirlerni keçirmemek içün bütün yerli akimiyetler deñişmeler kirsetmedi. Eñ beteri de şu ki, mayısnıñ 19-ı (bazar künü) Ukraina hatıra taqviminde Siyasiy repressiyalarnıñ qurbanlarını añma künü olaraq qayd etilgen ve Ukrainada Avropa Kününi teşkil etkenler olarnı kommunist rejimi qurbanlarına sayğısızlıq köstergeninde qabaatlamasın dep, bütün büyük eglenceli tedbirlerniñ keçirilmesini mayısnıñ 18-ne belgiledi. Kyiv devlet şeer memuriyetiniñ memurları qırımtatar halqınıñ faciasına ayrı ürmetsizlik ve tsinizm kösterdi», – dep yazdı Çubarov.
Qırımtatar Milliy Meclisi Ukraina Nazirler Şurası, yerli icra akimiyet organları, cemaat ve siyasiy teşkilâtlarını qırımtatar halqı genotsidi qurbanlarınıñ hatırasını ürmet etip, Ukraina Yuqarı Radasınıñ «Qırımtatar halqınıñ genotsidini tanuv» qararına emiyet bermesine çağırdı.
«Qırımtatar halqı genotsidi qurbanlarınıñ hatırasına ve siyasiy repressiyalar qurbanlarınıñ hatırasına ürmet kösterilüvini temin etecek acele tedbir almasını kerekli dep saya», – dep qoştı Çubarov.
Kyivde mayısnıñ 17-nden 19-na qadar Ukrainadaki Avropa Künleri çerçivesinde tedbir keçirilmesi planlaştırıla. Mayısnıñ 18-nde qırımtatar halqı genotsidiniñ qurbanları hatırasına çıqarılğan «Haytarma» ilk qırımtatar bediiy filmi kösterilecektir.
Bundan evel qırımtatar cemaatçılığını mayısnıñ 18-nde Kyivde Kyiv Klezmer Festival zemaneviy klezmer muzıkası ve yeudiy medeniyetiniñ festivalini keçirmek planları açuvlandırğan edi. Teşkilâtçılar bu künü bir de bir eglence ve muzıka programması olmaycaq, dep bildirdi.
Mayısnıñ 18-nde Kamânets-Podilskıynıñ şeer künü olacaq. Bu künü bayram programması, şu cümleden «Dj fest Fortetsâ» oyun muzıkası festivaliniñ keçirilmesi planlaştırıla.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
