Qırımtatar Milliy Meclisi halqara toplulıqnı Rusiyege qarşı basqı quvetleştirmesine, Ukrayinağa işğal etilgen topraqlarnı azat etmesinde qoltutmasına ve 1944 sürgünligini genotsid olaraq tanımasına çağırdı. Bu beyanatQırımtatar halqı genotsidiniñ qurbanlarını añma kününde derc etildi.
Vesiqada 81 yıl evelsi 200 biñ qırımtatarınıñ Qırımdan Orta Asiya, Sibir ve Uralnıñ uzaq regionlarına sürgün etilmesi başlandı, anda açlıq, hastalıq ve dayanılmaz şaraitlerden aman-aman 46%-ı can berdi, dep hatırlatıla.
«Bugün, 81 yıldan soñ ve Qırımnıñ Rusiye işğali başlağanından 11 yıl keçken soñ, qırımtatarlar kene repressiyalarğa, siyasiy taqiplerge oğray ve kimliklerini yoq etmege isteyler», – dep aytıla beyanatta.
Meclis halqara toplulıqqa muracaat ete:
- Siyasiy, diplomatik ve iqtisadiy mehanizmler vastasınen Rusiyege qarşı basqını quvetleştirmek;
- Ukrayinağa topraqlarınıñ azat etilmesinde yardımnı kenişletmek ve Avropa ve Qara deñiz regionında telükesizlikni temin etmek;
- Tamır halqlarnıñ BM tamır halqlarnıñ aqları şartnamesine köre aq-uquqlarını qorumaq, hususan qırımtatarlarnıñ;
- Qırımtatar halqı genotsidiniñ qurbanlarını añmaq, bu adiselerni insanlıqqa qarşı cinayetlernen küreşte global emiyetke saip olaraq tanımaq.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 200 biñden ziyade kişi sürgün etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.AqiqatnıñTelegram ve İnstagram saifelerinden taqip etiñiz.
