Qırımtatar Milliy Meclisiniñ reisi Refat Çubarovnıñ bildirgenine köre, mayısnıñ 18-nde bütün Ukraina boyunca saat 12:00-da qırımtatar halqı genotsidiniñ qurbanları hatırasına süküt daqqası ilân etilecek.
Çubarov jurnalist, telekompaniya, bloger, içtimaiy ağlarnıñ qullanıcıları ve bütün vatandaşlarğa muracaat etip, bu aktsiyağa qoşulmağa davet etti.
«Mayısnıñ 18-nde saat 12:00-da yayında, elektron resurslarıñıznıñ saifelerinde, başqa körüngen vastalarnen Qırımtatar halqı genotsidiniñ qurbanlarını añma kününe bağışlanğan metronom qoymağa rica etemiz», – dep yazdı Çubarov Facebookta.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
