Ukrainanıñ vaqtınca işğal etilgen topraqlarınıñ reintegratsiya meseleleri nazirligi dekabrniñ 14-nde keçirilgen mezatta “Massandra” Qırım şarap zavodınıñ “Rusiye” Bankı terkibindeki şirketke satıluvını “sahte” dep adlandırdılar. Nazirlikte işhaneniñ satıluv faktınıñ özüni ise yañı sanktsiyalar qoyulmasına sebep kibi sayalar.
“Kontsernniñ “hususiyleştirüvi” başlanğıç fiyatından bayağı az olğan fiyatqa satıldı. Yani bu, evelden kelişilgen netice ve sahte “mezat” alâmetidir. "Cenübiy leyha" satın alıcı şirketten ğayrı "mezatta" Moskvada qayd etilgen ve nizamname sermiyası 135 dollar teşkil etken tek bir şirket iştirak etti”, – qayd ettiler nazirlikte.
Nazir Oleksey Reznikov, “uquq cuetinden bu areketelr cinayet olaraq sayıla”, dep hatırlattı.
“Men tahmin etkenim kibi, işhaneniñ inkişafı ve yañartıluvı ile meraqlanğan iç bir ciddiy şirket bu saçmalıqta iştirak etmedi. “Massandra” “Rusiye” bankı terkibindeki şirketke keçti. Bu bank, onıñ esas açıq kâr alıcıları kibi, 2014 senesinden başlap halqara sanktsiyalar altındadır, bu daa Donbasta silâlı çatışma başlamazdan evel oldı. Yani "Massandranı" yarımadanıñ işğaliniñ ilhamlandırıcılarından biri olaraq sayılğanlar zapt etti. Evel bu şirket aynı böyle şekildi - mezat keçirip - "Novıy svet" zavodını satın alğan edi. "Massandra" şarap zavodı yoq etilüv telükesi altında olğan Ukraina ve ukrain Qırımınıñ medeniy asabalığınıñ parçasıdır. İşhane yoq etile bile, onıñ qıymetli aktivleri ise qırsızlanacaq. Bütün bularğa cevap berilmek kerek olacaq”, – idareniñ matbuat hızmeti Reznikovnıñ aytqanından alıntı ketire.
Onıñ qayd etkenine köre, Reintegratsiya nazirligi mezatnıñ teşkil etilüvine alâqadar olğanlarğa qarşı kerekli çareler körecek. Şu cümleden, nazirlik milliy sanktsiyalarnı, mahkeme esnasını başlatacaq ola, bu em halqara mahkemelerde de ve suçlularğa sanktsiyalar qoymaq ve sanktsiyalarnı quvetleştirimek içün halqara ortaqlarğa muracaat etecek ola.
“Açıq menbalarda olğan bütün vesiqalar (protokollar, arizalar, bunı teşkil etken reberlikniñ tercimeialları) endi bizde. Sanktsilar endi azırlana”, – dedi Reznikov.
Dekabrniñ 14-nde “Rusiye” bankınıñ terkibindeki “Cenübiy leyha” sıñırlanğan mesüliyetli şirket “Massandra” Qırım şarap zavodı satın aldı. Berilgen malümatqa köre şarap zavodı içün 5 milliard 327 million ruble berilgen.
“Cenübiy leyha” sıñırlanğan mesüliyetli şirket Sankt-Peterburgda qayd etilgen, onıñ 99,9 faizi “Rusiye aktsiyalı şirket”niñdir. 2017 senesi dekabr ayında şirket 1,5 milliard rublelik Suvdağdaki “Novıy Svet” şampan şarap zavodını satın aldı.
“Rusiye” bankı müdirler şurasınıñ sabıq reisi ve esas aktsiyacısı Yuriy Kovalçuktır, haber vastaları oña “Putinniñ kassacısı” deyler. Qırım işğal etilgen soñ, ABD Maliye nazirligi Kovalçukqa qarşı sanktsiyalar qoydı. Şimdiki vaqıtta “Rusiye” bankı yarımadada çalışa, o da sanktsiyalar altındadır.
Qırımdaki “Massandra” şarap zavodınıñ satıluvı qanuniy ceetten emiyetsizdir ve Rusiye bunıñ içün cevap berecek, dep qayd etti Ukraina Tış işler naziriniñ birinci muavini Emine Ceppar.
Qırım işğal etilgen soñ “Massandra” sanayı-agrar birleşme “devletleştirildi”, soñra ise Rusiye prezidentiniñ İdare departamentiniñ mülkü olaraq ilân etildi.
2019 senesi “Massandra” Rusiye federal mülkünden Kreml idaresi astındaki Qırım ukümetiniñ mülkiyeti oldı. 2020 senesi mayıs ayında ise Qırım parlamenti şarap zavodnı hususiyleştirilmek kerek olğan obyektler cedveline kirsetti.
2020 senesi noyabr ayınıda “Massandra” şarap zavodı satılıqqa çıqarıldı.
