Qırımdaki “Massandra” şarap zavodınıñ satıluvı qanuniy ceetten emiyetsizdir ve Rusiye bunıñ içün cevap berecek, dep qayd etti Ukraina Tış işler naziriniñ birinci muavini Emine Ceppar.
“Rusiye işğalci devlet olaraq Halqara gumanitar uquqnı kene bozdı. Sanktsiyalar tecriti şaraitinde Kreml qanunsız istimlâq etilgen ukrain "Massandra" şarap zavodını öz şirketine kapikke sattı. Bu qarar qanun ceetinden emiyetsizdir ve Rusiye bunıñ içün cevap berecek”, - dep yazdı Ceppar Twitter saifesinde.
QMC ve Aqyar şeeri Prokuraturasınıñ reisi İgor Ponoçovnıy, işğal etilgen Qırımdaki “Massandra” şarap zavodını özüne aluv ve satuv arbiy cinayet kibi sayıla, dep bildirdi.
Dekabrniñ 14-nde “Rusiye” bankınıñ terkibindeki “Cenübiy leyha” sıñırlanğan mesüliyetli şirket “Massandra” Qırım şarap zavodı satın aldı. Berilgen malümatqa köre şarap zavodı içün 5 milliard 327 million ruble berilgen.
“Cenübiy leyha” sıñırlanğan mesüliyetli şirket Sankt-Peterburgda qayd etilgen, onıñ 99,9 faizi “Rusiye aktsiyalı şirket”niñdir. 2017 senesi dekabr ayında şirket 1,5 milliard rublelik Suvdağdaki “Novıy Svet” şampan şarap zavodını satın aldı.
“Rusiye” bankı müdirler şurasınıñ sabıq reisi ve esas aktsiyacısı Yuriy Kovalçuktır, haber vastaları oña “Putinniñ kassacısı” deyler. Qırım işğal etilgen soñ, ABD Maliye nazirligi Kovalçukqa qarşı sanktsiyalar qoydı. Şimdiki vaqıtta “Rusiye” bankı yarımadada çalışa, o da sanktsiyalar altındadır.
Qırım işğal etilgen soñ “Massandra” sanayı-agrar birleşme “devletleştirildi”, soñra ise Rusiye prezidentiniñ İdare departamentiniñ mülkü olaraq ilân etildi.
2019 senesi “Massandra” Rusiye federal mülkünden Kreml idaresi astındaki Qırım ukümetiniñ mülkiyeti oldı. 2020 senesi mayıs ayında ise Qırım parlamenti şarap zavodnı hususiyleştirilmek kerek olğan obyektler cedveline kirsetti.
2020 senesi noyabr ayınıda “Massandra” şarap zavodı satılıqqa çıqarıldı.
