Kelecegimiz şimdi nasıl qıymet keskenimizge ve ne yapqanımızğa bağlıdır. Biz areket etemiz ya da areket etmeymiz.
Şimdiki vaziyetimiz sağlam olmağanını çoqumız añlay dep belleyim. O, halqımıznıñ inkişafına hızmet etmek maqsadı olğan serbestlik ve samimiylik taşqınlığını bastıra.
Alçaq adamlar onıñ ruhuna qast ete. Onı deñiştirmek, oña zıt olğan ıntıluvlarğa tabi etmege tırışalar. Zorlap qabul ettirilgen serbestlik eksikliginden memnün olmaq... Ne içün?
Ekseriyetimizniñ bu vaziyetnen razı olmağanını is etem. Amma bir çoq adamlar iç bir şeyni deñiştirip olamaycaqlarını tüşünip, oña teslim olmaqnı saylaylar.
Romain Rollandnıñ romanınıñ qaramanlarından biriniñ sözleri ne qadar aktualdir:" Alçaq adamlar yapmaları kerek olğanını yapalar: yalan aytalar, qırsızlaylar, öldüreler... "Dünyada pek çoq alçaq adamlar", - namuslı adamlar deyler. Yoq, qorqaqlar pek çoq. Namuslı adamlar arasında pek çoq qorqaqlar bar".
Çoqumıznı qorqaq olğanını tüşünmek fikirden çoq uzaqım. Amma bu maneviy hastalıqnıñ alâmetleri olduqça közge körüngen. Zaten peyda oluv sebepleri belli ve añlayışlı. Amma men er şeyden çoq onıñ, hususan gençler arasında tarqalmasına yol bermemek ister edim. Bu da belkide keskin sözler qullanmağa mecbur ete.
Yazıq ki, amma bunıñ diger tarafı da bar. O cesaretsizlikke, iradesizlikke sebep ola
Olduqça sıq büyükler şimdiki telükelerni kerekli kibi qıymetlendirip, gençlerni toqtata ve olarnıñ tabiiy isteklerini takbih etkenlerni eşitken edim. Yazıq ki, amma bunıñ diger tarafı da bar. O cesaretsizlikke, iradesizlikke sebep ola.
"Sabırlı ve insaniyetli ola bilirsiñ ve olmalısıñ. Amma doğru ve yahşı sayğanında şübelenmek mümkün degil. İnanğanını qorçala".
Büyük neslimiz aqsızlıq qarşısında boyun egse edi nenen ğurur duyar edik? Eger o zaman genç, cesür quvetlernen milliy arketke qoşulmasa ediler, bugün alçaq adamlarnıñ ögünde boyun egmek fırsatını tapacaq edi: "Sabr, çünki biz vatanımızda yaşaymız, sabırlı olmalımız".
Bugün vatanımız olur edimi?! Yoqsa alçaq adamlarnıñ zevqine masal "mubarekte" yaşamağa devam eter edimizmi?
Amma gençler tecribeli büyüklerniñ olarnı toqtatmaq, qorumaq ıntıluvları em soñraki nesiller, em de özleriniñ ögünde areketsizlik ve qorqaqlıq içün yeterli derecede aqlav olaraq hızmet etecegine aldanmamalıdır.
Olarnıñ vazifesi, mesüliyeti mevcut telükelerge doğru cevap tapmaqtır. Olarnıñ yetişken nesliniñ tabiiy ve mantıqlı isyanı.
"Yañğız isyanıñız faydasız olğanını tüşünmeñiz! Kendini tasdıq etmege cesaret etken temiz bir vicdan quvettir. Soñki yıllarda, devletniñ ve cemiyetniñ maneviy quvetten ğayrı diger silâsı olmağan namuslı adamnıñ fikrini tanımaq mecburiyetinde olğanını defalarca kördik".
Maneviy quvetimizge, vicdanımızğa, menligimizge ve israrımızğa inanam
Onyıllıq evel yazılğan bu sözler bugünde de keçmişimizge ve kelecegimizge lâyıq olmağa çağıruv kibi hızmet ete.
Halqımıznıñ ruhundan serbestlik ve adalet sevgisini silmek içün alçak adamlarnıñ bütün ıntıluvlarına baqmadan, eñ ümütsiz körüngen vaziyetni daa yahşı alğa ketire bilecek maneviy quvetimizge, vicdanımızğa, menligimizge ve israrımızğa inanam.
Asırlar devamında şanlı ve facialı tarih, maneviy medeniyet ve Yüce Allahqa olğan işançımız sayesinde qorqaqlıq, aşalıq ve ekiyüzlülikke qarşı küçlü muqavemetimiz qorqaqlıq virusınıñ vicdanlı adamlar arasında tarqalmasına imkân bermeycek.
Menim neslim Qırım üzerinde bayrağımıznı tutacağına inanam!
Nariman Celâl
Qırımda apiske alınğan qırımtatar faali, siyasetçi ve jurnalist Nariman Celâlnıñ beyanatını advokat Nikolay Polozov Facebook saifesinde derc etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.