Mahküm etilgen bloger, cemaat jurnalisti Nariman Memedeminovnıñ advokatı Rusiyeniñ Rostov-na-Donu Kirov rayon mahkemesine şartlı vaqtından evel azat etüv arizasını berdi. Bu aqta advokat Emil Kurbedinov Qırım.Aqiqat mühbirine bildirdi.
«Mahkemege (şartlı vaqtından evel azat etüv – QA) arizamız kele. Mahkeme Nariman tutulğan №1 SİZO memuriyetinden onıñ davasını ve hasiyetnamesini talap etecek. Soñra Nariman, tahqiqat izolâtorınıñ memuriyet vekili mahkemege çağırıla ve şartlı vaqtından evel azat etüv imkânı muzakere etile», – dedi Kurbedinov.
Onıñ aytqanına köre, imaye cemaat jurnalistiniñ şartlı olaraq vaqtından evel azat etilüvine dair arizanı daa üç ay evelsi bermesi mümkün edi, amma mayısnıñ 14-nde istinaf arizası baqılmazdan evel bunı yapıp olamadı.
«Fevral ayında Narimannı şartlı olaraq vaqtından evel azat etüv vaqtı keldi, amma istinaf daa soñra oldı. Üküm işke tüşürilgen soñ vesiqalarnı berip oldıq. Qasevetlenemiz, çünki Nariman koloniyağa ketirilse, faal olğanı ve (terror – QA) maddesi sebebinden memuriyet tarafından oña qarşı evelden yañlış munasebet ola bile. Bunıñ neticesinde davada tenbiler qayd etile bile ve şartlı vaqtından evel arizanıñ berilüvi mümkün olmaycaq», – dedi advokat.
2019 senesi oktâbr ayında mahkeme Memedeminovnı eki buçuq yıl yaşav tarzı koloniyasında qalmasına üküm etti.
Memedeminovnıñ imayesi Avropa insan aqları mahkemesine muracaat etmege niyetlene.
Bir sıra Ukraina aq qorçalayıcı ve media teşkilâtı halqara teşkilâtlarnı ve Avropa Birligi memleketleri, ABD, Kanada, Yaponiya ükümetlerinden Rusiyeden Memedeminovnı azat etmesini talap etmesine çağırdı.
Nariman Memedeminov – qırımtatar blogeri, vatandaş jurnalisti. Rusiye quvetçileri onı 2018 senesi martnıñ soñunda tutıp aldı. Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatladılar.
Rusiye quvetçilerini Memedeminovnıñ 2013 senesinden 2015 senesine qadar alıp barğan YouTubedaki videoblogu açuvlandırdı. Anda siyasiy adise-vaqialarnıñ izaatları ve islâm normalarına riayet etmek çağıruvları, Rusiye devlet bayramları – Vatan imayecisi künü, Dünya qadınlar künü, Bala künü ve digerleri – aqqında fikirler mevcut.
2018 senesi martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
