Rusiye nezaretinde olğan Qırım Yuqarı mahkemesi Ridvan Ümerovnıñ «çaqmamazlıq» davasında istinaf şikâyetini red etti, advokat Marlel Halikovğa atfı etip dep bildire «Qırım birdemligi» cemaat birleşmesi.
Sudaqta Kreml kontrolindeki şeer mahkemesiniñ oturışuvı vaqtında Rusiye prokurorı qırımtatar faali Ridvan Umerovnı «çaqmağanı» içün qabaatlı tanıp, 30 biñ ruble miqdarında para cezasını bermege talap etti.
Advokatnıñ malümatına köre, Sudaq şeer mahkemesinde uquq bozuvlar olğanını defalarca diqqat çekken.
«Amma buña baqmadan Qırım Yuqarı mahkemesi başlanğıç mahkemeniñ qararını qaldırmağa qarar aldı ve Ridvan Ümerovğa 30 biñ ruble miqdarında para cezasını quvette qaldırdı. Bu endi böyle dava boyunca istinaf şikâyeti red etilgen üçünci mabüstir», – dep bildirdiler birleşmede.
Rusiye kontrolindeki Sudaq şeer mahkemesi mayısnıñ 28-nde qırımtatar faali Ridvan Umerovğa başqasını çaqmağanı içün 30 biñ ruble para cezasını berdi.
Kreml kontrolindeki Sudaq şeer mahkemesi fevralniñ 15-nde «cinayet aqqında haber etmegeninde» qabaatlanğan (Rusiye Ceza kodeksiniñ 205.6 maddesi) qırımtatar faali ve din adamı Ridvan Umerovnıñ davasını temelden baqıp başladı. FSB tahqiqatçısı Valeriy Şerstükovnıñ bildirgenine köre, 2015 senesi «VKontakte» içtimaiy ağında Umerov Umicon Dadaconovnen yazışqan edi. FSB ise Dadaconov «IŞİD teşkilâtınıñ faaliyetinde iştirak etti», dep bildire.
2020 senesi avgustnıñ 31-nde peyda olğan malümatqa köre, Rusiye quvetçileri Sudaq, İçki ve Seyitler rayonlarında qırımtatarlarnıñ evlerini tinte. Faallerniñ malümatına köre, tintüvler Enver Topçi, Ayder Ablâkimov, Ridvan Umerov ve Ayder Kadırovnıñevinde keçirildi. Onıñ ömür arqadaşı evlerinde tintüv olmadı, amma aqayınıñ Ukraina pasportı tutıp alındı, onı ise Aqmescitke sorğuğa alıp ketkenler, dep bildirdi.
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
Ukraina Tış işler nazirligi Qırımda keçirilgen yañı tintüv ve insan tutuvlarına qarşı narazılıq bildirdi ve Rusiyeden BM qararlarınıñ yerine ketirmesini ve tutulğan qırımtatarlarnı azat etecegini bekley, dep bildirdi.
