Rusiye kontrolindeki Qırım Yuqarı mahkemesi dekabrniñ 11-nde qırımlı Aleksandr Sizikovnıñ sıñırlav tedbirini uzatuv qararına qarşı berilgen istinaf şikâyetini red etip, onı ev apsinde qaldırdı.
Bu aqta «Qırım birdemligi» cemaat birleşmesi haber ete.
Advokat Safiye Şabanovanıñ qayd etkenine köre, er adamı birinci derece saqatı ve tibbiy baquvğa ihtiyacı bar.
«Aleksandr bu sıñırlav tedbiri yaşayışına mania ola, dep çoq ayttı. Pensiyası berilmey, subetleşip yürmege imkânı yoq, amma çoqça areket etmesi kerek ve şimdi zornen yaşay. Aleksandr azatlıqtan marum etüv, hususan ev apsi ile bağlı olmağan bir sıñırlav tedbiri berilmesini rica etti. Mahkeme bütün muracaatlarımıznı körmemezlikke urdı ve birinci instantsiya mahkemesiniñ qararını deñiştirmedi», – dedi Şabanova.
Hatırlatamız, noyabrniñ 26-nda Rusiye kontrolindeki Aqmescitniñ Kiyev rayon mahkemesi FSB tahqiqatçısınıñ muracaatını qanaatlendirip, «Hizb ut-Tahrir davasınıñ» mabüsi Aleksandr Sizikovnı 2021 senesi martnıñ 2-ne qadar ev apsinde qaldırdı.
Rusiye kontrolindeki Aqmescitniñ Kiyev rayon mahkemesi oktâbrniñ 14-nde Bağçasaraydaki «Hizb ut-Tahrir davasınıñ» mabüsi Aleksandr Sizikovnı Aqyar şeer psihiatrik hastahanesine mahkeme-psihiatrik ekspertizasına bir ayğa yollamağa qarar aldı.
Ukraina Rusiyeden FSB tarafından «Hizb ut-Tahrir» teşkilâtını qurğanında qabaatlanğan qırımlı Aleksandr Sizikovnı azat etmesini talap ete.
İyülniñ 7-nde Rusiye kontrolindeki Aqmescitniñ Kiyev rayon mahkemesi «Hizb ut-Tahrir» teşkilâtını qurğanından şübheli sayılğan Sizikovnı ev apsine yolladı. Sizikov birinci derece saqatı olı, 2009 senesi soqurlaştı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
