Rusiyeniñ nezaretinde olğan Qırımnıñ Kirovsk rayon mahkemesi «Qırım birdemligi»niñ koordinatorı ve cemaat imayecisi Mustafa Seydaliyevni 10 künge tevqif etti. Sebep «ekstremit materiallarnıñ yazılması ve yayınlaması» oldı. Bunı «Qırım birdemligi» cemaat birleşmesinde haber ettiler.
«Mahkemede ilk olaraq faalge qarşı Rusiye Federatsiyası Memuriy uquq bozmalar qanunnamesiniñ 20.29 maddesine binaen tizilgen protokol baqıldı. Reislik etken qadı Georgiy Tsertsvadze, 2021 senesi dekabrniñ 1-nde Seydaliyevniñ idare etken "VKontakte" saifesine ekstremit materiallarnıñ federal cedvelindeki videonı yerleştirgenini qayd etti. Erkeniñ bildirgenine köre, bu saifege kiriş parollerni daa 2016 senesi ğayıp etken, yazı ise 2012 yerleştirilgen. Bundan ğayrı, protokollarnı tizgen "E" merkeziniñ üyken hadimi Nikolay Lapik sorğuğa çekildi. O, vaqıtnı uzatmamaq içün advokatnıñ iştirak etmesine ihtiyac olmağanını añlattı», – dep yazıla bildirmede.
Mudafaa tarafı bir sıra bozuvğa diqqat etti. Şu cümleden, yazı daa Ukraina yurisdiktsiyası vaqtında yerleştirilgenine ve Ukraian qanunlarını bozmağanına diqqat etti.
«Rusiye Federatsiyası Memuriy uquq bozmalar qanunnamesiniñ 20.3 maddesine bineen tizilgen ekinci protokol aynı şekilde baqıldı. Qadı İgor Degtâröv diñleyicilerni kirsetmedi, tercimanğa iştirak etmege izin bermedi ve Seydaliyevni qabaatlı tanıdı», – dep haber ettiler bildirmede.
Cezasını Seydaliyev Aqmescitte Franko 44 bulvarındaki MTİ çekecek.
Evel, dekabrniñ 7-nde memuriy apis cezası bitken soñ Kezlev polis bölüginden yiberilmedi.
Aqmescitte noyabrniñ 23-nde aqşam Rusiye quvetçileri azatlıqqa çıqqan Edem Semedlâyevni qarşılamaq içün vaqtınca tutuv izolâtorınıñ binasına kelgen faallerni tuttı. 31 insan tutuldı, aralarında 10 qadın, jurnalistler ve matbuat kartları olğan «Qırım birdemliginiñ» mühbirleri bar. Tutulğanlar üç polis bölügine alıp ketirildi.
Aqmescitniñ vaqtınca tutuv izolâtorınıñ binası ögünde tutulğan 15-ten çoq qırımtatar faali Rusiye kodeksiniñ memuriy maddesine istinaden apiske alındı.
Qırım Muhtar Cumhuriyeti ve Aqyar prokuraturası qırımtatar faalleriniñ tutuluvı sebebinden cinaiy tahqiqat başlattı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti böyle çağıruvlarnı körmemezlikke ura.
