«Qırım birdemliginiñ» koordinatorı, cemaat imayecisi Mustafa Seydaliyev dekabrniñ 7-nde memuriy apis cezası bitken soñ Kezlev polis bölüginden yiberilmedi. Bu aqta cemaat birleşmesi haber etti.
Faallerniñ malümatına köre, oña qarşı yañı memuriy protokollar tizildi.
Qayd etilgenine köre, advokatlar Edem Semedlâyev ve Emil Kurbedinov bölük binasına kirsetilmedi.
«Tutulğan kişi uquqçığa telefon etip, Ekstremizm ile küreş merkeziniñ yolbaşçısı Ruslan Şambazov Rusiye Federatsiyasınıñ Memuriy bozuvlar kodeksiniñ 20.3 maddesine («Ekstremist teşkilâtlarınıñ timsallerini açıq numayış etüv ya da propagandası») ve Rusiye Federatsiyasınıñ Memuriy bozuvlar kodeksiniñ 20.29 maddesine («Ekstremist malümatlarnı azırlav ve tarqatuv») istinaden memuriy protokollar tize. Olarğa köre 1 biñden 3 biñ rublege qadar para cezası ya da musaderenen beraber 15 künge qadar memuriy apis cezası berile», – dep aytıla haberde.
Kurbedinov, mahkemege müvekkiline advokat kirsetilmey ve «tutulğan kişiniñ bulunğan yeri aqqında yalan aytılğanını» haber etecek, dep bildirdi.
Soñra Semedlâyev ve Kurbedinov Rusiye prokuraturası ve Qırımdaki Tahqiqat komitetiniñ idaresinden Seydaliyev tutulğan Kezlev İç işler nazirliginiñ bölügini teşkermege talap ettiler.
«Polis hadimleriniñ işbu qanunsız areketleri Seydaliyevniñ imaye ve diger aqlarını bozdı», – dep yaza şikâyette imayeciler ve Kezlev polis bölüginde qabaatlı olğanlarnı mesüliyetke çekmek içün tedbir almağa talap ete.
Seydaliyev dekabrniñ 7-nde saat 19:30-da azatlıqqa çıqacaq edi, o, 14 künlik memuriy apis cezası yekünlengen soñki faaldir.
Aqmescitte noyabrniñ 23-nde aqşam Rusiye quvetçileri azatlıqqa çıqqan Edem Semedlâyevni qarşılamaq içün vaqtınca tutuv izolâtorınıñ binasına kelgen faallerni tuttı. 31 insan tutuldı, aralarında 10 qadın, jurnalistler ve matbuat kartları olğan «Qırım birdemliginiñ» mühbirleri bar. Tutulğanlar üç polis bölügine alıp ketirildi.
Aqmescitniñ vaqtınca tutuv izolâtorınıñ binası ögünde tutulğan 15-ten çoq qırımtatar faali Rusiye kodeksiniñ memuriy maddesine istinaden apiske alındı.
Qırım Muhtar Cumhuriyeti ve Aqyar prokuraturası qırımtatar faalleriniñ tutuluvı sebebinden cinaiy tahqiqat başlattı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti böyle çağıruvlarnı körmemezlikke ura.
