Advokat Safiye Şabanovanıñ bildirgenine köre, Rostov-na-Donu Cenübiy okrugınıñ arbiy mahkemesi Aqmescitteki ekinci «Hizb ut-Tahrir davasınıñ» mabüslerini Aqmescit SİZOsından Rostov izolâtorına avuştırmağa qarar berdi.
Bu aqta o, «Qırım birdemligine» haber etti.
Onıñ aytqanına köre, dekabrniñ 30-nda olğan oturışuvda Rusiye mahkemesi imayeniñ bütün muracaatlarını red etti, sıñırlav tedbiri ise daa 6 ayğa uzatıldı.
«Sıñırlav tedbiri 2021 senesi iyünniñ 16-na qadar altı ayğa uzatıldı, mahkeme mabüslerni Rostov-na-Donu №1 SİZOsına avuştırmağa qarar berdi», – dedi advokat.
Nevbetteki oturışuv yanvarniñ 12-ne belgilendi.
Advokatnıñ bundan evel bildirgenine köre, mezkür dava mabüsleri Eskender Suleymanov, Asan Yanikov, Akim Bekirov, Seitveli Seytabdiyev, Rustem Seythalilov, Tofik Abdulgaziyev, Vladlen Abulkadırov, İzzet Abdullayev, Mecit Abdurahmanov, Bilâl Adilov Aqmescit tahqiqat izolâtorınıñ tutuv şaraitlerini şikâyet ete.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
