Rusiyedeki Cenübiy bölgeniñ arbiy mahkemesi Aqmescit «Hizb ut-Tahrir davası»nıñ mabüsleri Seytveli Seytabdiyev, Akim Bekirov, Rustem Seythalilov, Asan Yanikov ve Eskender Suleymanovnıñ tevqif müddetini dekabrniñ 15-nece uzattı
Bunı «Qırım birdemligi» cemaat birleşmesi haber etti.
Tevqif müddetiniñ uzatılmasını Rusiye prokurorı Sergey Aydinov teklif etti. Onıñ fikrince mahkemelengenler "şaatlarğa tazyıq ete bile, mahkemeden gizlenmege tırışa bile", sağlıq alları ise SİZO-da bulunmağa imkân bere.
Bu davanıñ figuratnlarından biri Asan Yanikov qadılarğa muracaat etip, prokurornıñ delillerine esassız dedi.
«Sağlıq vaziyeti, "gizlenmek niyeti" aqqında aynı boş sözler. Diger gruppadaki menim qardaşımnıñ (Servet Gaziyev) betiniñ bir tarafı paraliç oldı. Sizce, insan SİZO-da tutulmaması içün alı nasıl olmalı eken? Ğaliba morgta tutıla bilenecek mevta olmalı», – dedi Yanikov.
Mudafaa tarafınıñ ve mahkemelergenlerniñ itirazlarına baqmadan, mabüsleriniñ tevqif müddetini dekabrniñ 15-nece uzattı.
Hatırlatamız, fevralniñ 3-nde Vlasiha şeerindeki İstinaf arbiy mahkemesiniñ oturışuvında Aqmescitteki «Hizb ut-Tahrir davasınıñ» mabüsleri Seytveli Seytabdiyev, Akim Bekirov, Rustem Seythalilov, Asan Yanikov ve Eskender Suleymanov Rusiye mahkemesiniñ erkânını ve oturışuvdaki prokurornı çetleştirdi.
Yanvarniñ 18-nde Asan Yanikov ve Aqmescitteki ekinci «Hizb ut-Tahrir davasınıñ» diger mabüsi Seytveli Seytabdiyev Aqmescitten Rostov-na-Donu SİZO-1-ge etap etildi.
Rusiyeniñ Rostov-na-Donu Cenübiy okrugı arbiy mahkemesi Aqmescitteki «Hizb ut-Tahrir davasınıñ» mabüsleri Cemil Gafarov, Servet Gaziyev, Alim Karimov, Seyran Murtaza ve Erfan Osmanovnıñ apis müddetini yarım yılğa uzattı, soñra olarnı Aqmescit SİZOsından Rusiyege etap etecekler.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Rustem Şeyhaliyev, Osman Arifmemetov ve Remzi Bekirov bar ediler.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
