Qırımlı advokatlar Emil Kurbedinov ve Edem Semedlâyev Novoçerkassktaki (Rusiye) SİZO-3-te tutulğan müvekkilleriniñ «dayanılmaycaq tutuv şaraitlerini» şikâyet etti. Bu aqta «Qırım birdemligi» cemaat birleşmesi Qırım.Aqiqatqa bildirdi.
«Advokat Emil Kurbedinov Cezalarnı yerine ketirüv federal hızmetiniñ Baş idaresi, Rostov vilâyeti prokuraturası ve Rostov Cemaat nezaret komissiyasına şikâyet etip, Novoçerkasstaki SİZO-3-ni teşkermege talap etti. Qırımtatar siyasiy mabüsleri sıçavul, böcek, antisanitariya, saylavlarda rey bermege mecbur etilgenleri aqqında tarif etti», – dep ayttı faaller.
Qayd etilgenine köre, Kurbedinov bu SİZOda tutulğan Qırımdaki «Hizb ut-Tahrir davasınıñ» mabüsleri Riza ve Enver Ömerovlar, Rustem Emirüseinov ve Server Mustafayevni ziyaret etti.
Advokatnıñ birleşmege tarif etkenine köre, Server Mustafayev izolâtorda bulunğan vaqıt devamında endi 39 sıçavulnı öldürdi – olar ayaqqabı ve urbasını bozdı, bundan ğayrı, mabüslerni qasartqı kibi böcekler raatsızlay.
«Şikâyetler vastasınen bir şeyge irişmek pek zor, memuriyet qulaq asmay», – dep bildire müvekkilleriniñ sözlerini Kurbedinov. – «Ekimler sıcaqnı bile baqmaylar, sıcaqölçerleri yoq dep».
Bundan ğayrı, imayeciniñ malümatına köre, kameralar yahşı avalandırılmay, mantar oldı, suv er vaqıt berilmey ve içilmey, mabüslerge yer yetmey, kenefler sanitar normalarına uyğun degil, er künlik kezinti aqqı körmemezlikke urula, telefon etmek aqqı yerine ketirilmey. Kurbedinov, mabüslerni saylavlar kününde rey bermege zorladılar, dep ayttı.
«Advokat Edem Semedlâyev Ruslan Mesutov, Eldar Kantemirov ve Server Zekiryayevniñ menfaatları içün böyle şikâyetler yazdı. Anda siyasiy mabüsler saylavlarda rey berüvge mecbur etildi, razı olmasalar, küç qullanılacaq ve tutuv şaraitleri fenalaştırılacaq kibi qorquzuvlar oldı, dep qayd etile», – dep aytıla birleşmeniñ haberinde.
2019 senesi Mustafayevniñ advokatı Lilâ Gemeci tutulğan Rusiye SİZOsındaki şaraitlerni «işkence» dep adlandırğan edi.
2018 senesi mayısnıñ 21-nde «Qırım birdemligi» cemaat teşebbüsiniñ koordinatorı Server Mustafayev ve qırımtatarı Edem Smailov Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi. «Memorial» aq qorçalayıcı merkezi Server Mustafayevni siyasiy mabüs dep tanıdı.
İyünniñ 10-nda Aluştadaki «Hizb ut-Tahrir davası» boyunca oturışuvda taraflarnıñ munaqaşası vaqtında Rusiye prokurorı mahküm etilgen qırımlılar içün 14 yıldan 19 yılğa qadar sert rejimli koloniyada qalmalarını istedi.
Prokuror Lenur Halilovnı 18 yıl sert rejimli koloniyada azatlıqtan marum etmege, azat etilgen soñ azatlığını 1 yılğa sıñırlamağa, Ruslan Mesutovnı 18 yıl sert rejimli koloniyada azatlıqtan marum etmege, azat etilgen soñ azatlığını 1 yılğa sıñırlamağa, Ruslan Nagayevni 15 yıl sert rejimli koloniyada azatlıqtan marum etmege, azat etilgen soñ azatlığını 1 yılğa sıñırlamağa, Eldar Kantemirovnı 12 yıl sert rejimli koloniyada azatlıqtan marum etmege, azat etilgen soñ azatlığı 1 yıl devamında sıñırlamağa rica etti.
2019 senesi iyünniñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtınıñ faaliyetini teşkil etüv ya da iştirak etüv) çerçivesinde keçirile ve «Hizb ut-Tahrir» teşkilâtınen bağlı, dep bildirdi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
