Lvivde aprelniñ 7-nde Qırımda Rusiye akimiyeti tarafından tutulğan faallerge qoltutmaq içün «Qırımtatarlarğa birdemlik kösterem» aktsiyası keçirile, dep bildire Azatlıq Radiosınıñ mühbiri.
Aktsiyanıñ maqsadı – babasız qalğan qırımlı balalarğa qoltutmaq, Qırım sakinlerine qarşı yapılğan repressiyalarğa lvivlilerniñ diqqatını celp etmek.
«Bu aktsiya balalarğa qoltutmaq içün keçirile. Mahkeme, apis cezaları olğanda… 167 bala babasız yaşay. Bütün dünya bunı bilsin isteymiz. İşğal etilgen Qırımda olğanlarğa bugün informatsion ceetinden diqqat celp etemiz. Bir afta evelsi kütleviy apis cezaları oldı», – dep ayttı aktsiyada Ernest Abkelâmov, Lvivdeki qırımtatar medeniyet merkeziniñ reisi.
Qırımdan köçip kelgenler Rusiyeniñ Qırım işğali devamında apiske alınğan, ğayıp olğan ya da Rusiye akimiyetiniñ repressiyaları neticesinde ölgen yarımada sakinleriniñ fotoresimlerinen stendlerni taqdim etti.
«Aktsiyamızğa lvivlilerniñ qoşulmasını, fikirlerini paylaşmasını, repressiyalarğa oğrağan, aqlarını qorçalağan Qırım sakinlerinen birdemligini köstermelerini isteymiz», – dep qayd etti Enver Bekirov, Lvivdeki qırımtatar medeniyet merkeziniñ vekili.
Lviv sakinleri qollarına «Men – «Qırım birdemligim», «Balalarğa babalarını qaytarıñız» yazuvlı şiarlarını alıp foto çıqardı.
Lviv göñüllileri qırımtatar aşlarını pişirmek içün soqaqta aşhane qurdı. Mında el işleri de satıla, kâr etilgen para ise apiske alınğan qırımlılarnıñ balalarına yollanacaq.
Aktsiya iştirakçileri keçip ketkenlerge malümat risalelerini berdi.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Martnıñ 27-nde ve 28-nde Aqmescitniñ Kiyev rayon mahkemesi tutulğan faallerni apiske aldı.
Martnıñ 29-nda Rusiye uquq qoruyıcıları Qırımdaki tintüvlerden soñ qıdırılğan qırımtatar faali Edem Yayaçikovnı tutıp aldı.
Aqmescitniñ Bavurçı qasabasında keçirilgen tintüv vaqtında semetdeşlerine qoltutmağa kelgenlerden eki kişi Eskender Mamutov ve Emil Ziyadinov da tutuldı. Aqmescit mahkemesi Ziyadinovğa «politsiyağa qarşı çıqqanı içün» 500 ruble para cezasını berdi. Mamutov ise 5 künge apiske alındı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
Martnıñ 29-nda Qırımnıñ Rusiye ombudsmeni Lüdmila Lubina Qırım.Aqiqatqabildirgenine köre, Qırımda tevqif etilgen 23 qırımtatar faalini Rusiyege alıp ketkenler.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
