Cumaertesi künü, mayısnıñ 29-nda, kiçik biznes vekilleri ve Lviv sakinleri aralarında Qırımdan köçip kelgenler olğan yerli alış-veriş merkezinde yer kiralap, «Krımska perepiçka» müessisesini açqanlarğa qol tutuv aktsiyasını ötkermege planlaştıra, dep bildire zahid.net yerli neşiri.
Neşirniñ qayd etkenine köre, sakinler alış-veriş merkezi saipleriniñ yapılacaq tamir işleri sebebinden bu yerni 30 kün içinde boşatmaq talabına qarşı narazılıq bildire. Kiracılar, bu olarnı quvmaq içün manaçıq ola, çünki bu yerde büyük zıncır marketini açmağa isteyler, dep tüşüne.
Aqmescitten köçip kelgenler «İntegral-Bud» müessisesine ait «İntersiti» idariy-ticaret merkezinde yer kiralap, köçip kelgenlerni işke qabul etti. O vaqıttan berli bu yer Lvivde belli oldı, müşterileri bar. Bu yıl mayısnıñ 14-nde müessise hadimleri alış-veriş merkeziniñ saiplerinden kiralağan yerni boşatmaq talabınen mektüp aldı.
«Anda çalışam, anda para qazanıp, kiralağan evimniñ parasını bermege imkânım bar. Bu bir leyha, ve başta Oksana (müessise qurucısı Oksana Novikova – QA) başlağanda bu Qırım kimligini saqlap qalmaq içün bir meydançıq olacağını muzakere etken edik. Anda qırımtatar medeniyeti taqdim etilgen», – dep bildire «Krımska perepiçka» hadimi ve qırımtatar cemiyetiniñ vekili Ernest Abkelâmovnıñ aytqanlarını neşir.
«İntegral-Bud» vekiliniñ Azatlıq Radiosına bildirgenine köre, alış-veriş merkezini bütünley tamir etüv planları bar, şunıñ içün añlaşmanı bozmağa teklif etildi.
«İş adamları öz yerlerine qaytarmı – yer ve planlarınen bağlı bir mesele. Men tahmin etip olamayım. Tamir işlerini aytacaq olsaq, yatırımcı bunı nasıl yapacağını özü bile. Ekinci-üçünci degil de, birinci qat olacağını ne içün añlatamız. Kiralağan yerge para bergen biznes belli bir müddetke esaslana. «Krımska perepiçka» özüni ödev müddetine esaslanmağanından şübhelenem, kirağa berilgen yer mülk degildir ve yarın onı yañı saipke satarmız dep tüşünmek ve emin olmaq yañlıştır. Biz iş adamları imzalağan añlaşmağa uyğun şartlarnı teklif ettik», – dep aytqan edi «İntegral-Bud» vekili Yekaterina Ciçka.
