Ukrayina Silâlı quvetleri içün dronlarğa donat yapqanında qabatlanğan Yalta sakini Lüdmila Kolesnikovanıñ ükmü "yerine ketirildi". Üçünci istinaf mahkemesi şikâyetini qanaatlendirmeyip, Qırım mahkemesiniñ 17 yıl apis qararını deñiştirmedi, dep haber ete "Tribunal. Krımskiy epizod" telegram kanalında.
Rusiye işğal etken Qırımdaki mahkemeniñ qararına qarşı istinaf şikâyeti Rusiyede baqıldı.
"Kolesnikova hırsızlanğan ve üç ay devamında izolâtsiyada tutulğan edi, soñra adil bir mahkeme imkânından marum etildi, çünki esnası qapalı rejimde keçti ve imaye tarafı içün bir sıra ciddiy mania oldı. Halqara gumanitar uquq bozulıa, istinaf şikâyeti Qırımda degil, işğal etken memlekette (Rusiyede – QA) baqıldı. Soçi qadısı Yevgeniy Saltıkov bu qanunsızlıqqa köz yumıp, bu arbiy cinayetlerniñ iştirakçisi ola ve erte ya da keç halqara mahkemede cevap berecek", – dep aytıla haberde.
Lüdmila Kolesnikova Ukrayina milisinde çalışqan edi, yarımada işğalinden soñ Rusiye polisinde bir qaç yıl soraştırıcı olıp çalıştı. Em Ukrayina, em Rusiye vatandaşlığı bar edi. Soñra polisten ketip, şahsiy şirkette uquqçı olıp çalıştı. Rusiyeniñ Ukrayinağa qarşı büyük istilâsı başlağanınen İrlandiyağa ketti, amma 2024 senesi anası pek hasta olğanı içün Yaltağa qayttı. Cenazesinden soñ sabıq polis hadimi tutuldı.
Rusiye uquq qoruyıcıları Yalta sakinini Ukrayina Silâlı quvetlerine para yollağanı içün devlet hainliginde qabaatladı.
Tahqiqatnıñ malümatına köre, 34 yaşında qırımlı 2023 senesi aprel ayında Dublinde (İrlandiya) bulunıp, çetel bankı vastasınen Ukrayina Silâlı quvetlerini maliye etken teşkilâtqa para yollağan eken.
"KrımSOS" aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.