Rusiye kontrolindeki Qırım Yuqarı mahkemesiniñ ATR qırımtatar telekanalınıñ saibi Lenur İslâmovğa qarşı dava oturışuvında Vovan tahallüsi ile belli Rusiye prankeri Vladimir Kuznetsovnıñ şaatlığı seslendirildi. Bu aqta advokat Nikolay Polozov bildirdi.
«O, (Vovan – QA) dedi ki, ekinci prankernen beraber İslâmov ve Cemilevniñ telefonlarını ögrengenler, Ukraina sim-kartlarını satın aldı ve özüni de Avakov, de Ğeraşçenko olaraq tanıtıp, batalyon, tayanğıçlar aqqında sorağan ediler. Amma, asılında, kimnen laf etkenleri belli degil, çünki müvekkilimniñ kerçek sesini belgileycek ekspertiza – fonoskopiya – yapılmadı», – dedi Polozov.
Berilgen malümatqa köre, pranker Vovan oturışuvda yoq edi. Rusiye quvetçileriniñ bildirgenine köre, qayd olğan adresi boyunca kelgende qapunı açqan olmadı. Qabaatlavnıñ daa bir şaatı, «qanunsız birleşmelerde iştirak etkeni» içün mahküm etilgen ve koloniyada bulunğan Rustem İlyasov koloniyadan SİZOğa belli olmağan sebeplerden ketirilmedi.
Advokat Nikolay Polozovnıñ aytqanına köre, daa soñra mahkeme imaye tarafına delillerni tedqiq etmege teklif etti.
«Meraqlı bir şey. Mahkeme dava malümatında olğan videolarnı tedqi etmege teklif etken soñ, Lenur İslâmovnıñ intervyüsı ve çeşit beyanatlarını tedqi etüv muracaatı birden qanaatlendirilmedi. Qadılar Refat Çubarov ve Mustafa Cemilevni imaye tarafınıñ şaatları olaraq sorğuğa çekmege razı olmadı. Qadılar esnasnı aşıqtıra kibi kele. Yañı yıldan evel üküm çıqarmağa isteyler, dep tüşünem», – dedi Polozov.
Oktâbrniñ 26-nda mahkeme Rusiye prokurorınıñ prankerler Vovan ve Leksusnıñ (kerçek adları Vladimir Kuznetsov ve Aleksey Stolârov) şaatlığını aydınlatuv muracaatını qanaatlendirmedi. Advokat, Kuznetsovnı zorlap ketirmege qarar aldı, dep bildirdi.
Vladimir Kuznetsov ve Aleksey Stolârov mahkeme qararını izaatlamadılar.
2015 senesi Rusiye prankerleri Vovan ve Leksus «Qırımnıñ vatandaş qamaçavınıñ» teşebbüsçileri Mustafa Cemilev ve Lenur İslâmovnen bir sıra subet keçirip, itibardan tüşürgen malümatnı ögrendi, dep bildirgen edi. Prankerlerniñ aytqanına köre, bir ay devamında olar Cemilev ve İslâmovğa sabıq halq deputatı Anton Ğeraşçenko ve Ukraina İç işler naziri Arsen Avakov adından telefon etip, Qırımnıñ memuriy sıñırında elektrik ayaqlarını kimler patlatqanını bildi. İslâmov ise ses qaydı sahte olğanını bildirgen edi.
Rusiye akimiyeti İslâmovnı federal qanunğa zıt bir şekilde silâlı birleşme qurğanında (Rusiye Ceza kodeksiniñ 208-inci maddesiniñ 1-inci qısmı), diversiyalar yapıp, büyük mülk zararı ketirgeninde (Rusiye Ceza kodeksiniñ 281-inci maddesiniñ 2-nci qısmınıñ «a», «b» noqtaları), kütleviy haber vastaları üzerinden Rusiye topraq bütünligini bozmağa çağırğanında (Rusiye Ceza kodeksiniñ 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı) qabaatladı.
İslâmovnıñ Qırım.Aqiqatqa bildirgenine köre, onıñ Rusiye kontrolindeki Qırım Yuqarı mahkemesiniñ oturışuvlarında iştirak etmege niyeti yoq. O, Qırımda oña qarşı esnasnı «sahte mahkeme» dep adlandırdı.
Rusiye FSBsi 2015 senesi oktâbr ayında Lenur İslâmovğa qarşı cinaiy dava açıp, onı federal qıdıruvğa ilân etti.
2015 senesi dekabr ayında Rusiye kontrolindeki Qırım mahkemesi İslâmovnıñ yarımadadaki mülkini tevqif etti. Dekabrniñ 21-nde Qırımnıñ Rusiye prokurorı olğan Natalya Poklonskaya İslâmovnı ğıyabiy şekilde diversiyalarda qabaatladı. İslâmov bu qabaatlarnı qanunsız dep adlandırdı.
