Rusiye kontrolindeki Qırım Yuqarı mahkemesi oktâbrniñ 26-nda ATR qırımtatar telekanalınıñ saibi Lenur İslâmovğa qarşı açılğan cinaiy davanı baqmağa devam etti.
Advokat Nikolay Polozovnıñ bildirgenine köre, mahkeme Rusiye prokurorınıñ prankerler Vovan ve Leksusnıñ (kerçek adları Vladimir Kuznetsov ve Aleksey Stolârov) şaatlığını aydınlatuv muracaatını qanaatlendirmedi. Advokat, Kuznetsovnı zorlap ketirmege qarar aldı, dep bildirdi.
«Davada qabaatlav tarafı delillerni köstere. Prokuror delillerniñ büyük qısmını endi kösterdi, bugünki mahkeme oturışuvı vaqtında mahkeme taraflarnıñ bir sıra muracaatını diñlep qanaatlendirdi. Mahkeme imayeniñ davada olğan delillernen tanış olmaq içün olarnıñ berilüvine dair muracaatını qanaatlendirdi. Laf mahkeme tahqiqatı vaqtında qısmen tedqiq etilgen foto, ses ve video ile 14 disk aqqında kete», – dep bildirdi Polozov.
Nevbetteki oturışuvnıñ keçirilüvi noyabrniñ 9-na belgilendi.
Vladimir Küznetsov ve Aleksey Stolârov mahkeme qararını izaatlamadılar.
2015 senesi Rusiye prankerleri Vovan ve Leksus «Qırımnıñ vatandaş qamaçavınıñ» teşebbüsçileri Mustafa Cemilev ve Lenur İslâmovnen bir sıra subet keçirip, itibardan tüşürgen malümatnı ögrendi, dep bildirgen edi. Prankerlerniñ aytqanına köre, bir ay devamında olar Cemilev ve İslâmovğa sabıq halq deputatı Anton Ğeraşçenko ve Ukraina İç işler naziri Arsen Avakov adından telefon etip, Qırımnıñ memuriy sıñırında elektrik ayaqlarını kimler patlatqanını bildi. İslâmov ise ses qaydı sahte olğanını bildirgen edi.
Rusiye akimiyeti İslâmovnı federal qanunğa zıt bir şekilde silâlı birleşme qurğanında (Rusiye Ceza kodeksiniñ 208-inci maddesiniñ 1-inci qısmı), diversiyalar yapıp, büyük mülk zararı ketirgeninde (Rusiye Ceza kodeksiniñ 281-inci maddesiniñ 2-nci qısmınıñ «a», «b» noqtaları), kütleviy haber vastaları üzerinden Rusiye topraq bütünligini bozmağa çağırğanında (Rusiye Ceza kodeksiniñ 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı) qabaatladı.
İslâmovnıñ Qırım.Aqiqatqa bildirgenine köre, onıñ Rusiye kontrolindeki Qırım Yuqarı mahkemesiniñ oturışuvlarında iştirak etmege niyeti yoq. O, Qırımda oña qarşı esnasnı «sahte mahkeme» dep adlandırdı.
Rusiye FSBsi 2015 senesi oktâbr ayında Lenur İslâmovğa qarşı cinaiy dava açıp, onı federal qıdıruvğa ilân etti.
2015 senesi dekabr ayında Rusiye kontrolindeki Qırım mahkemesi İslâmovnıñ yarımadadaki mülkini tevqif etti. Dekabrniñ 21-nde Qırımnıñ Rusiye prokurorı olğan Natalya Poklonskaya İslâmovnı ğıyabiy şekilde diversiyalarda qabaatladı. İslâmov bu qabaatlarnı qanunsız dep adlandırdı.
