Mahkeme matbuatnı qayd etmedi ve oturışuvda devlet sırı olğan malümat seslendirilecek dep, esnasnı qapattı. Advokat Olga Dinzeniñ fikirince, operativ hadimler ve tahqiqatçılar aqqında malümattan ğayrı, tahqiqatçınıñ mahkemege bergen malümatnıñ bir sırı yoq.
İmayeciniñ fikirince, tahqiqat ilk tahqiqatnı üç ayda bitirip olamay ve tahqiqatçı Umerovanıñ sıñırlav tedbirini uzatuv aqqında rica etecek. Bu dava ekspertizaları belgilenmedi ve keçirilmedi. İlk tahqiqat müddeti ne içün uzatıla imaye tarafına haber etilmey.
Mahkeme tahqiqatçınıñ muracaatını qanaatlendirip, SİZOda tutuv müddetini üç ayğa uzattı – 2024 senesi yanvarniñ 4-ne qadar. Leniye Umerovanıñ sıñırlav tedbiri üçünci kere uzatıla.
Bıltır dekabr ayında 25 yaşındaki Leniye Umerova Kıyivden Qırımğa ketmege mecbur edi, çünki babasınıñ qanseri bar. Rusiye sıñırcıları Leniye Umerovanı Gürcistan-Rusiye sıñırından keçken soñ rejim alanı qaidelerini bozğanı sebebinden tuttı.
Ağası Aziz Umerov Qırım.Aqiqatqa izaat berir eken, qardaşı üç ay devamında çetele vatandaşları içün merkezde tutuldı, dep tarif etti. Amma martnıñ 13-nde mahkeme qararınen onı andan azat etip aldılar.
«Advokatlarğa, tuvğanlarına telefon etmege imkân bermediler – gece yarısı onı o merkezden çıqardılar. Bundan soñ vatandaş urbada erkeklernen maşina keldi, başına çuval taqqanlar, belli olmağan yerge alıp ketkenler ve soqaqqa atqanlar», – dep tarif etti Umerov.
Aman-aman birden Leniyeni vesiqaları olmağanı içün polis patruli tuttı, dep tarif etti ağası. Rusiye mahkemesi ise onı 15 künge apiske aldı. Soñra qızğa qarşı daa eki protokol tizildi – ana-babasına telefon etmek içün qullanğan telefonını vaqtında bermegeni ve konvoy maşinasından çıqmağa razı olmağanı içün. Eki sefer de mahkeme Ukrayina vatandaşınıñ apis müddetini 15 künge uzattırdı.
Mayısnıñ 5-nde Moskva Lefortovo mahkemesi qırılı Leniye Umerovanı devlet hainliginde qabaatlap apiske aldı.
Qırım Muhtar Cumhuriyeti ve Aqyar prokuraturası Rusiye tarafından qırımtatarı Leniye Umerovanıñ tutulğanını tahqiq etip olamay, çünki bu cinayet Qırımda olmağan.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
