Link açıqlığı

Saatnıñ esas haberi

“Lefortovo” SİZO-sında tutulğan Qırım sakini Yatskin bağrı ağrısına şikâyet ete  – advokat


İvan Yatskin
İvan Yatskin

Advokat Nikolay Polozov “Lefortovo” (Moskva) SİZO-sında bağrı ağrısına şikâyet etken müşterisi – qırımlı İvan Yatskinni ziyaret etken.

“İvan Yatskin bağrı ağrısına şikâyet ete – üç ay evelsi o, yıqılğan edi, o zaman oña şeer travmpunktta rentgen yapılğan edi. Şu rentgen resmi ğaliba coyuldı, ya da daa bir şey oldı, amma alâ daa apishane ekimi onı tekrar baqmadı, birinci resimni yapqan ekim, resimni tapıp, onı tekrar baqacağını aytqan edi. Tapmağandır”, – dep yazdı Polozov Facebookta.

Advokatnıñ yazğanına köre, Yatskinniñ özü, “qaburğasında çatlama bar”, dep saya eken.

Bundan ğayrı İvan Yatskinni köz ekimi baqqan ve yañı közlük içün retsept yazıp bergen.

Moskvadaki birinci istinaf mahkemesi Qırım sakini İvan Yatskinniñ tevqif müddetiniñ uzatılmasına qarşı berilgen istinaf şikâyetini red etti.

Evel Moskva yeer mahkemesiniñ mahkemecisi Oleg Muzıçenko Qırım sakini İvan Yatskinniñ tevqif müddetini eki ayğa uzatqan edi.

Qırımnıñ Curçı rayonınıñ Aybar (Voykovo) köyüniñ sakini İvan Yatskin 2019 yılda oktâbr 16-sında tutuldı. Bu 2019 senesi dekabr ayında belli oldı.

Polozov, Yatskin apiske alınğan soñ Qırımdan Moskvağa çıqarıldı, dep bildirgen edi. Onıñ aytqanına köre, Rusiye quvetçileri qırımlığa «büyük maneviy basqı» yaptı.

Qırım.Aqiqatnıñ Ukraina telükesizlik hızmetine yollağan muracaat cevabında İvan Yatskin UTH ile işbirligi yapmadı, dep aytıla.

Rusiye FSBsi devlet hainliginde qabaatlanğan qırımlı İvan Yatskinniñ davası boyunca tahqiqatnı küzde bitirmege planlaştıra.

XS
SM
MD
LG