Kyivde qırımtatar halqı sürgünliginiñ qurbanları hatırasına abide tikleme içün yer qıdıralar, dep bildirdi Qırım.Aqiqat Radiosınıñ yayınında Ukrayına milliy añ institutınıñ yolbaşçısı Anton Drobovıç.
«Biz bu yerlerniñ muzakere etilüvine faal celp etildik. Biz şeerniñ merkezinde bir yer olmalı, dep israr etemiz. Bol yer olmalı, eski abideler ceetinden degil, sovet abidelerinden de uzaq olmalı. Ayrı bir abide olmalı, qırımtatar halqınıñ tarihiy aqiqatına uyğun yañı bir yer», – dedi Drobovıç.
Qırımtatar Milliy Meclisi reisi Refat Çubarov qırımtatar halqı genotsidiniñ qurbanlarına abide leyhası azırlandı, dep bildirdi. Onıñ aytqanına köre, Meclis Ukrayına cemiyetinde felâketni añlasınlar, abideni körgenler qırımtatar faciasını Ukrayına tarihınıñ, Ukrayına faciasınıñ bir qısmı olaraq körsin, memleketniñ kelecegi içün birleşsin istey.
1944 senesi mayısnıñ 18-nde Sovet rejimi Qırımdan Orta Asiyağa bütün qırımtatar halqını sürgün etti. Üç kün içinde 200 biñ qırımtatar mal vagonlarında Vatanından alıp çıqarıldı.
Er yıl Qırımda qırımtatar halqı sürgünliginiñ qurbanlarını añma tedbirleri, hususan Qırım paytahtıla matem mitingi keçirile edi. Amma Rusiye Qırım yarımadasını işğal etken soñ Aqmescitniñ merkezinde böyle aktsiyalarnıñ keçirilüvi yasaqlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
