Qırımtatar Milliy Meclisi qırımtatar halqı genotsidiniñ qurbanlarına abide leyhasını azırladı. İş keçirile, yeri muzakere etile, dep bildirdi Refat Çubarov «Suspilne» intervyüsında.
Onıñ aytqanına köre, Meclis Ukrayına cemiyetinde felâketni añlasınlar, abideni körgenler qırımtatar faciasını Ukrayına tarihınıñ, Ukrayına faciasınıñ bir qısmı olaraq körsin, memleketniñ kelecegi içün birleşsin istey.
«Halqlarımız yoq etilecek edi, bunıñ tekrarlanmaması pek müim. Bu abide Ğolodomor, Holokost, sürgün kibi deşetli cinayetler bir daa tekrarlamasın dep hatırlatmalı», – dep qayd etti Meclis reisi.
O, Ukrayına imayesinde insanlarnı birleştirgen 10 yıllıq Rusiye-Ukrayına ceetinden bu pek müim, dep qoştı.
«Kelecekte küçlü inkişaftan emin olmaq içün bu cenk bitken soñ, ğalebeden soñ Ukrayına cemiyetiniñ bizim içün emiyetli olğan qıymetler ve adise-vaqialar esasında tesirleşmesi pek müim», – dep qayd etti Çubarov.
Ukrayına Tış işler nazirligi ortaqlarını 1944 senesi qırımtatar halqınıñ sürgünligi genotsid olaraq tanımasına çağırıp, Rusiyeden işğal etilgen Qırımda insan aqları bozuluvını toqtatmasını talap ete.
1944 senesi mayısnıñ 18-nde Sovet rejimi Qırımdan Orta Asiyağa bütün qırımtatar halqını sürgün etti. Üç kün içinde 200 biñ qırımtatar mal vagonlarında Vatanından alıp çıqarıldı.
Er yıl Qırımda qırımtatar halqı sürgünliginiñ qurbanlarını añma tedbirleri, hususan Qırım paytahtıla matem mitingi keçirile edi. Amma Rusiye Qırım yarımadasını işğal etken soñ Aqmescitniñ merkezinde böyle aktsiyalarnıñ keçirilüvi yasaqlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
