Cumaertesi künü, noyabrniñ 19-nda, Kyivde «Qırım inciri» ukrain-qırımtatar edebiyat yarışınıñ ğalipleri taqdirlendi.
Tedbir meşur Amerika tarihçısı, Yale universitetiniñ professorı Timoti Snayderniñ «İncir nutqundan» başlandı.
Bundan soñ jüri azaları Andrey Kurkov, Cemile Suleymanova, Katerına Kalıtko, Bekir Mamut, Mayye Safet, İvan Andrusâk, Anastasiya Levkova, Alim Aliyev, yırcı Jamala, Ukrayına Tış işler naziriniñ birinci muavini Emine Ceppar, yazıcı ve şaire Maryana Savka, jurnalist Sevgil Musayeva, oyuncı ve rejissör Ahtem Seitablayevniñ iştiraki ile «Qırım inciri» yarışınıñ ğalipleri ilân etildi.
«Qırım inciri» dördünci yarışınıñ final iştirakçileri metin oqudı.
Teşkilâtçılar bu yıl mart ayında tedbir ötkerecek edi, amma Rusiye Ukrayınağa qarşı büyük cenk başlatqanı içün onı başqa vaqıtqa qaldırdı.
«Qırım inciri» dördünci yarışı vaqtında jüri tek Ukrayınanıñ degil, dünyanıñ çeşit köşelerinden 137 müellifniñ 292 eserini aldı: şiiriyet, qırımtatarca ve ukraince nesir, ukrainceden qırımtatarcağa ve aksine tercime, bala edebiyatı.
«Bu cenk vaqtında Rusiye yoq etmege tırışqan toprağımıznı ve kimligimizni mümkün olğanı qadar qorumalımız. Qırım İnciri – böyle leyhalardan bir danesi, o, yarımadağa intellektual baqışımıznı da şekillendire», – dep qayd ete Alim Aliyev, «Qırım inciri» edebiyat leyhasınıñ esasçısı.
Mukâfat laureatları:
- Qırım aqqında ukraince nesir: Yuliya İlüha «Tramontana»
- Qırımtatarca nesir: Hatice Velişayeva «Nuruzan»
- Qırım aqqında ukraince şiir: Valeriya Sergeyeva «Vidmıkayeş vertep iz sokırıtsi ta inşi virşi»
- Qırımtatarca şiir: Seit-Yagya Kazakov «Menim altin beşigim»
- Qırım aqqında bala edebiyatı: Dilâra İbragimova ve Susanna Cemileva «Qaşıqköylü Parij qızları ya da Parijni körmek ve»
- Qırımtatarcadan ukraincege bediiy eser tercimesi: İnessa Dalenik Aliye Kence-Aliniñ poeması «Sandıq-Qayanıñ» tercimesinen
- «Söz serbestligi» mahsus nominatsiyası: qırımlı siyasiy mabüsler Nariman Celâl, Server Mustafayev ve Ahtem Asa
- «Qırımtatar edebiyatınıñ inkişafına qoşulğan isse içün» mahsus mukâfat: Şeryan Ali
«Qırım inciri» tedbirleri Qırım evi, «Starıy Lev neşriyatı», EVO şirketi, Ukrayına PENi yardımınen keçirile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
