Cumaertesi künü, mayısnıñ 18-nde, Kyivde filatelistler Ukrpoştanıñ mahsus müürinen pullarnı bastı. Tedbir qırımtatar halqı genotsidiniñ 75 yılına bağışlandı, dep haber ete Qırım.Aqiqat mühbiri.
Bu hatıra kününe Ukrpoşta qırımtatar ressamı Rustem Eminovnıñ «Ölüm treni 2» resimi ile pulsız zarfnı qullanuvğa çıqarğan edi.
Kyiv filatelist cemiyetiniñ reis muavini Vadim İşçenkonıñ Qırım.Aqiqatqa tarif etkenine köre, kyivli kollektsiyacılar Qırımnıñ filatelist cemiyeti ile bareber matem adisesine bağışlanğan poçta pulunı işlep çıqardı.
«Pulda qırımtatar halqınıñ sürgünlik ve genotsid kününe bağışlanğan 2019 senesiniñ mahsus logosı bar. Bu logonı Qırım evi azırladı. Öz pulnı yerine ketirüv ğayesi meselesinde Qırım eviniñ reberliginden yardım ve bu logonı qullanmaq içün izin aldıq. Öz logonı çıqaruv – matem adisesine bağışlanğan umumiy tedbirlerniñ keçirilmesine qoşqan küçük issemizdir».
Öz pul nushaları Qırımtatar Milliy Meclisine, Qırım evine ve Poçta Müzeyine berilecektir.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
