Kyivde dekabrniñ 13-ünde ekinci "Qırım inciri" ebebiy yarışınıñ ğaliplerini ilân ettiler, dep bildire Qırım.Aqiqat mühbiri.
“Ukrain tilinde Qırım aqqında nesir” nominatsiyasında "Qırım gözleri" eserine Can Gül ğalebe qazandı.
“Qırımtatar tilinde nesir” nominatsiyasında "Ceviz teregi ve gülidan çeçegi" eserinen" Zera Bekirova ğalip çıqtı.
“Ukrain tilinde Qırım aqqında şiiriyet” nominatsiyasında Sergey Sinoptik birinci yerni aldı.
“Qırımtatar tilinde şiiriyet” nominatsiyasında "Qırımım, azizim, bekleysiñ meni!" şiirinen Seyran İbraim ğalebe qazandı.
"Qırım aqqında bala edebiyatı" nominatsiyasında "Tılsımcı" eserinen Alime Kürkçi ğalip çıqtı.
“Ukrain tilinden qırımtatar tiline tercime” nominatsiyasında Seyare Kökçe birinci yerni aldı, o, Marianna Kiyanovskaya ve Sergey Jadannıñ şiirlerini tercime etti.
“Qırımtatar tilinden ukrain tiline tercime” nominatsiyasında Vyaçeslav Levıtskıy ğalebe qazandı, o, Elmaz Bahşış, Tair Kerim, Seyare Kökçe ve Maye Safetniñ şiirleriniñ tercimesini yaptı.
"Azatlıq sözleri" mahsus nominatsiyasınen, türmeden öz mektüplerini yollağan eki siyasiy mabüsni qayd ettiler: "Hizb ut-Tahrir davası"nıñ iştirakçileri Osman Arifmemetov ve Server Mustafayevni.
Daa bir "Qırımtatar edebiyatına isse qoşuv" nominatsiyasınen qırımtatar şairi Şükri Appaznı qayd ettiler.
Ekinci "Qırım inciri" edebiy yarışına 300-den çoq metin yolladı, olarnıñ arasında: ukrain tilinde - 165 eser, qırımtatar tilinde - 83, qırımtatar tilinden ukrain tiline tercimeler -35, ukrain tilinden qırımatatar tiline tercime - 21. Teskilcilerniñ malümatına köre, bu yıl yarışta Ukrainanıñ 20 vilâyetinden, bundan ğayrı, Türkiye, Poloniya, Bulğaristan ve Ürdünden müellifler iştirak etti.
“Qırım inciri” yazıcılar yarışı 2018 senesi yazda ilân etildi, konkurs eserleriniñ qabul etüvi oktâbrniñ 31-inde bitti. Bu vaqıt devamında jüri azaları, “Ukrain tilinde Qırım aqqında nesir”, “Qırımtatar tilinde nesir”, “Ukrain tilinde Qırım aqqında şiiriyet”, “Qırımtatar tilinde şiiriyet”, “Qadın nazarı”, “Qırımtatar tilinden ukrain tiline tercime”, “Ukrain tilinden qırımtatar tiline tercime” nominatsiyalarında 135 müelliften 244 iş aldı.
Sentabrde Lvivde 26-ncı Neşirciler forumı çerçivesinde "Qırım incirini cıyaraq" şiiriyet ve nesir oqumaları keçirildi.
