Kyivdeki Qırım Muhtar Cumhuriyeti musulmanları diniy idaresiniñ binasında mayısnıñ 2-nde «Bir vucud» adlı qırımlı siyasiy mabüslerge qoltutuv aktsiyası keçirildi. Qırım.Aqiqat mühbiriniñ bildirgenine köre, aktsiya martnıñ 27-nde FSB tarafından keçirilgen tintüvlerden soñ tutulğan qırımtatar faallerine bağışlandı.
Tedbirni Qırım Muhtar Cumhuriyeti musulmanları diniy idaresiniñ müftisi Ayder Rustemov açtı. O, «Rusiye yarımadada yaşağan qırımtatarlarnı Qırım ilhaqını tanımağanları içün taqip ete», dep ayttı.
«Rusiye Federatsiyasınıñ repressiv maşinası klassik usullarnı qullana. Bugün olar «Hizb ut-Tahrir» ve diger manaçıqlarnı qullana. Amma bütün bu aletler qırımtatarlarğa, Ukraina vatandaşlarına qarşı gibrid repressiyalarnı yapmaq içün qullanılğanını añlaymız. Bu insanlar Rusiye işğalini tanımay», – dedi Rustemov.
Qırımtatar Milliy Meclisiniñ reisi Refat Çubarov «siyasiy mabüslerniñ azat etilüvi ve Qırımnıñ işğalden qurtarıluvında halqara yardım müim ola», dep qayd etti.
«Qırımtatar halqına, bu siyasiy mabüslerden er birine yardım etmek ve Qırımnı qurtarmaq içün ortaqlar ne qadar çoq olsa, o qadar yahşı. Biz öz başına Qırımnı azat etip olamamız. Çaremiz olsa da, şimdi barıp azat eter edik. Siz barmaycaqsıñızmı? Men de barmaycam. Çünki bunı özümiz yapıp olamamız. Ukraina öz başına, Devlet olaraq, bunı özü yapamaz», – dedi Çubarov.
Tedbir vaqtında ATR telekanalınıñ jurnalisti Seytumer Seytumerov martnıñ 27-nde keçirilgen tintüvler ve tutulğanlar aqqında tarif etti. Aktsiyanıñ soñunda QMC Musulmanları diniy idaresiniñ müftisi Ayder Rustemov dua oqup, SİZO ve apishanelerde tutulğan qırımlılar ve «işğalci Rusiye akimiyeti tarafından repressiyalarğa oğratılğan qırımtatar halqı ve avtoritar memleketlerde qanunsız taqip ve repressiyalarğa oğrağa bütün insanlar» içün yardım istedi.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Martnıñ 27-nde ve 28-nde Aqmescitniñ Kiyev rayon mahkemesi tutulğan faallerni apiske aldı.
Martnıñ 29-nda Rusiye uquq qoruyıcıları Qırımdaki tintüvlerden soñ qıdırılğan qırımtatar faali Edem Yayaçikovnı tutıp aldı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
Martnıñ 29-nda Qırımnıñ Rusiye ombudsmeni Lüdmila Lubina Qırım.Aqiqatqabildirgenine köre, Qırımda tevqif etilgen 23 qırımtatar faalini Rusiyege alıp ketkenler.
