Dekabrniñ 12-nde Kyivde Mustaqillik meydanında Halqara insan aqları qoruv kününde "Siyasiy mabüslerge azatıq" adlı aktsiya keçirilecek. Bunıñ aqqında teşkilâtçılar Facebookta haber etti.
"İşğalci Rusiye rejimi tarafından tutulğan vatandaşlarımıznıñ ayatına lâqayt olmağan er kesni davet etemiz. Bir saat vaqtıñıznı ayırıñız, çünki bizim diqqatımız Kreml mabüsleriniñ er bir ailesine signaldır ki, Ukraina cemiyeti olarnı unutmadı ve olarnı azat etmege tırışa", - dep yazıla teşkilâtçılarnıñ beyanatında.
Aktsiyada uquq qoruyıcı teşkilâtlarnıñ, siyasiy mabüsler platformasınıñ, mustaqil cemaat teşkilâtlarnıñ temsilcileri, Milliy Meclis azaları, ükümet vekilleri, Qırım ve Donbastan köçip kelgenler, siyasiy mabüslerniñ tuvğanları iştirak etecek olalar.
Aktsiya vaqtında sabıq Kreml mabüsleriniñ iştiragi ile "Buğavlar azatlığımnı alıp olmaz" adlı performans keçirilecek.
Evel, Ukraina prezidenti Volodmır Zelenskıy, Türkiye Kyivniñ azat etmege tırışqan siyasiy mabüslerniñ cedvelini Rusiye tarafına bergenini bildirdi.
