Türkiye Mudafaa naziri Hulusi Akar Kyivge kerçekleştirgen resmiy ziyareti çerçivesinde qırımtatar halqınıñ lideri, Ukraina Yuqarı Radasınıñ deputatı Mustafa Cemilevnen ve Türkiye Cumhuriyeti ile parlamentlerara bağlar gruppasınıñ reisdeşi Rustem Umerovnen körüşti. Körüşüv vaqtında Türkiye nazirine işğal etilgen Qırımda insan aqları bozulğanını tarif etkenler. Bu aqta Umerov Qırım.Aqiqatqa bildirdi.
Onıñ aytqanına köre, körüşüvde Ukrainadaki siyasiy vaziyet aqqında da aytıldı. «Türkiye mudafaa nazirine işğal etilgen Qırımda olıp keçken soñki adise-vaqialar, hususan tintüv ve yañı apiske aluvlar aqqında tarif ettik. Bugünki künde 120-den çoq qırımtatarı Qırım ve Rusiye apishanelerinde buluna. Bu malümatnı Tış işler nazirligi (Ukraina Tış işler nazirligi – QA) vastasınen Türkiye elçihanesine bergen edik», – dep qayd etti Umerov.
Onıñ malümatına köre, Türkiye eyyeti alğan malümatnı Tış işler nazirliginen muzakere etecek ve bunı Türkiye reberligine yetkizecek, dep vade etti. Umerov, körüşüvde infrastruktura leyhaları da muzakere etildi – Kyivde Cuma Cami kompleksi ve vaqtınca işğal etilgen Qırımdan köçip kelgenler içün mesken qurucılığı.
«Ümüt etemiz ki, memleketlerimiz arbiy-tehnik saada işbirligi yapacaq, çünki Türkiye Qara deñizde küçlü bir ortaq ola, Ukraina telükesizligi içün bizim eyi dostane munasebetlerde», – dedi Umerov.
İyülniñ 7-nde saba erte qırımlılarnıñ evlerinde tintüvler keçirildi: Emil Ziyadinov, İsmet İbragimov, Alim Sufyanov, Seyran Hayretdinov, Aleksandr Sizikov, Vadim Bektemirov, Zekirya Muratov ve Aluştada Dilâver Memetov. Memetov tintüv vaqtında evde degil edi, onı qıdırmağa devam eteler, dep bildire «Qırım birdemliginiñ» faalleri.
Rusiye FSBsiniñ malümatına köre, mahsus hızmetniñ hadimleri Qırımda «Hizb ut-Tahrirni» teşkil etkeninden ve iştirak etkeninden şübheli sayılğan yedi insannı tuttı.
Ukraina prezidentiniñ Qırım Muhtar Cumhuriyetindeki temsilciligi Rusiye quvetçileriniñ areketlerini takbih etti, Milliy politsiyanıñ Qırım Muhtar Cumhuriyeti ve Aqyar Baş idaresi ise Ukraina Ceza kodeksiniñ 162-nci maddesiniñ 2-nci qısmına istinaden (mesken tiyilmemezligini bozuv) cinaiy tahqiqat başlattı.
Ukraina Tış işler nazirligi beyanatını derc etip, «qırımtatarlarnıñ evlerinde keçirilgen yañı qanunsız tintüvler ve tutuvlarnen bağlı narazılığını» bildirdi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
