Kyiv işğal etilgen Qırımda Rusiye quvetçileriniñ qırımtatarlarnıñ evlerinde keçirgen yañı tintüvleri sebebinden Avropa Şurasına ve teşkilâtnıñ aza memleketlerine muracaat azırlay.
Bu aqta Ukraina halq deputatı, Avropa Şurası Parlament assambleyasınıñ daimiy eyyet reisi Volodımır Aryev Facebook saifesinde bildire.
«Qırımtatarlarğa qarşı yañı repressiyalar dalğası. İşğalcilerniñ faallerni qorquzmaq içün yapılğan quvet aktsiyasıdır. Avropa Şurasına ve teşkilâtnıñ aza memleketlerine muracaat azırlaymız», – dep yazdı Aryev.
Aprelniñ 30-nda saba Aqmescit civarında Rusiye quvetçileri qırımtatarlar Rolan Osmanov ve Dilâver Bekirovnıñ evlerini baqıp çıqtı. Aqmescitte Dilâver Bekirovnıñ oğlu Ruslan Bekirovnıñ evi tintildi ve onı alıp kettiler. Bunıñ sebepleri belli degil.
Rusiye quvetçileri bunıñnen bağlı açıq izaatlar bermey.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
