Link açıqlığı

Saatnıñ esas haberi

Kyiv: deputatlar soqaqlarğa qırımtatar erbaplarınıñ adlarını bermege añlaştılar


Amet-Han Sultan

Kyiv şeer şurasınıñ medeniyet, turizm ve informatsion siyaseti meseleleri daimiy komissiyasınıñ toplaşuvında yanvarniñ 15-nde deputatlar Kyivniñ eki soqağına qırımtatar erbaplarınıñ adlarını bermek teşebbüsine qoltuttı. Bu malümat Kyiv şeer şurasınıñ saytında derc etildi.

«Böylece, Qırımtatar Milliy Meclisi ve Qırım eviniñ Ukraina paytahtında eki soqaqqa ulu qırımtatar erbapları – yazıcı ve maarifçi İsmail Gasprinskiy ve qırımtatar uçucısı Amet-Han Sultannıñ adını bermek teklifine qoltuttılar», – dep bildirdi «Qırım evi» teşkilâtı.

İsmail Gasprinskiyniñ adını Kyivniñ Dnipro rayonındaki Sormovskaya soqağına, Amet-Han Sultannıñ adını ise Konstantin Zaslonov soqağına bermege teklif etile.

«Soqaqlarğa ulu qırımtatar erbaplarınıñ adlarını berüv – tek sovet keçmişinden vazgeçüv degil, qırımtatar medeniy ve tarihiy mirasını umummilliy mirasqa ilâve etüvdir. Qırımtatarlar bir qısmı olğan Ukraina siyasiy milleti, şübhesiz, böyle qurula. Şunıñ içün Kyiv şurasınıñ deputatları bu müim qararğa rey bereceginden eminim», – dep qayd etti teşebbüsçilerden biri, «Qırım eviniñ» programma müdiri Alim Aliyev.

İşğal etilgen Qırımda Aqmescitniñ mesken kvartallarındaki soqaqlardan birine «DNR» qanunsız silâlı birleşmesiniñ öldürilgen yolbaşçısı Aleksandr Zaharçenkonıñ adını bermeleri mümkün.

Berilgen malümatqa köre, Aqmescitniñ yañı Çuqurça 2 (Lugovoye-2) qasabasında soqaqlarnıñ adları deñiştirile bile. Yerli sakinlerniñ teşebbüs gruppası rus adlarını qırımtatar adlarına deñiştirmege teklif etti.

XS
SM
MD
LG