Aqmescitniñ Rusiye memuriyeti, Çuqurça 2 (Lugovoye 2) qasabasınıñ soqaq adlarını deñiştirüv meselesini muzakere ete. Bu aqta şeer memuriyetiniñ matbuat hızmeti haber ete.
Berilgen malümatqa köre, soqaqlarğa qırımtatar adlarını bermege isteyler.
«Vatandaşlardan Çuqurça 2 qasabasında 11 soqaqnıñ adını deñiştirmek ricasınen muracaat keldi. Yerli sakinlerniñ teşebbüs gruppası rus adlarını qırımtatar adlarına deñiştirmege teklif ete», – dep tarif etti memuriyetniñ reis muavini Aleksandr Makar.
Onıñ aytqanına köre, soqaq adlarını deñiştirmege istegenler 11 soqaqnıñ sakinlerinden imza toplap, er bir qırımtatar adınıñ berilüvini keniş şekilde isbatlamalı.
«Bu vesiqalar azır olğanda komissiya bu muracaatnı tekrar baqacaq», – dedi Makar.
Rusiye Federatsiya Şurasınıñ Qırım azası Sergey Tsekov Aqmescit soqaqlarından birine Moskvanıñ sabıq şeer yolbaşçısı Yuriy Lujkovnıñ adını bermege teklif etken edi. Bundan evel Rusiye LDPR lideri Vladimir Jirinovskiy Qırım şeerleriniñ soqaqlarına başqa ad bermege teklif etken edi. Yaltada Voykov soqağına Gimnaziçeskaya adını bermege teklif etilgen edi.
