Ukraina TİN başı Dmıtro Kuleba Letoniya TİN başı Edgars Rinkeviçs ile telefonnen laf etip, Rusiye tarafından Qırım ve Donbasta vaziyetniñ kerginleşmesini muzaker etti.
«Dmıtro Kuleba Letoniya zenaatdaşına Rusiyeniñ turğunsızlaştıruv arekteleri aqqıda aytıp berdi. Bularnıñ arasında Donetsk ve Lugansk vilâyetlerinde ve Qırımda vaziyetniñ kerginleşmesi, ateşni toqtatuv rejimini bozuv, devletimizniñ sıñırları yanında orudsınıñ toplaması, şiddetli Rusiye propagandası», – dep yazıla Ukraina TİN matbuat hızmetiniñ bilidrmesinde.
Letoniya TİN başı Ukrainağa birdemlik ve Letoniya Ukraina toparq bütünligi ve suverenitetini desteklemege devam etkenini bildirdi.
«Edgars Rinkeviçs, Ukraina Rusiye tecavuzına qarşı turıp olması içün halqara destekni arttırmaq maqsadınen Letoniya Ukrainanı yalıñız ekitaraflı seviyede degil, amma AB, NATO ve diger halqara formatlarda da desteklemege devam etecegine inandırdı», – dep yazla bildirmede.
Evel Ukraina Silâlı Quvetleri Baş ştabınıñ yolbaşçısı Ruslan Homçak bildirdi ki, martnıñ başında Novorossiysk ve Stavropolden işğal etilgen Qırımğa talimler içün avuştırılğan Rusiye ordusı yarımadada qalmağa devam ete.
Rusiye prezidenti Vladimir Putinniñ matbuat kâtibi Dmitriy Peskov bildirgenine köre, «Rusiyeniñ memleket topraqlarında istegeni kibi ordu avuştırmağa aqqı bar».
Beyaz ev ABD prezidenti Joseph Biden ve Ukraina devlet başı Volodımır Zelenskıy telefondan laf etkenlerini resmiy tasdıqladı ve Amerika devlet başı «Rusiyeniñ Qırım ve Donbastaki devam etken tecavuzı qarşısında Ukrainağa» destegini tasdıqlağanını bildirdi.
Qırım işğali
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
