İşğal etilgen Qırım üç künden berli furtuna aqibetlerinen küreşe. Yel ve sağanaq mesken yerlerni elektrikasız qaldıra ve soqaqlarnı suv basa. Eñ qıyın vaziyet – Qırımnıñ yalı boyunda: anda özenler taştı, eali tahliye etile. Furtuna qaplap alğan Qırım yarımadasında ne oldı – Qırım.Aqiqatnıñ maqalesinde oquñız.
Qırımda oktâbrniñ 18-nden berli furtuna devam ete. Küçlü ruzgâr ve furtunanıñ aqibetlerini ilk olaraq Yalta is etti. Ava bozuldı – yel arttı, sağanaqlar başladı, ve furtuna diger regionlarğa keldi.
"Ay-Petride bir künde 245 millimetr yağanaq yağdı – aylıq normasınıñ üç qatı. Yaltada – bir künde 89 mm, aylıq normasınıñ eki qatı. Nikita bağçasında – 20 mm. Bağçasaray rayonında yağanaqlar 50 mm olaraq qayd etildi. Qalğan rayonlarda daa az", – dep bildirdi Qırımnıñ kütleviy haber vastalarına regional Gidromettsentr reberi Tatyana Lübetskaya.
Qırım yarımadasınıñ farqlı regionlarında elektrika hatları bozuldı, terekler tüşti ve yerlerni suv bastı.
Evlerniñ ögünde suv ve bostanlardan tahliye
Cenübiy yalıdaki Koreiz qasabasında da vaziyet zor. Devamlı yağanaqlar sebebinden Üzen Çeşme özeni taştı, ve qasaba soqaqlarını çamurlı aqımlar bastı.
Mesken evlerniñ bostan ve azbarları suv altında qaldı. Yerli sakinler qurtarıcılarnen beraber suv toplap, evlerni suvdan qorumaq içün taşlardan qora yapmağa mecbur.
Qırımnıñ Rusiye Fevqulâde vaziyetler nazirligi bildirgenine köre, suv basqan yerlerde qum çuvalları qoyula, böylece suvnıñ mesken evlerge keçmesine mania yapacaq olalar. Zarar körgenler aqqında malümat şimdilik yoq.
Yerli Rusiye akimiyeti eki qorantanıñ tahliyesi aqqında bildire. Vaziyet beterleşse, qurtarıcılar sakinlerni bostanlardan tahliye etüv yolunı belgiledi.
İleride bu yerlerniñ sakinleri başqa yerlerge köçürile bile, dep ayta yerli memurlar.
"Suv yolunda mesken inşaatlar bar. Avalar açılğanınen baqacaqmız. İnşaatlarnıñ suv keçmesine mania olğanı tasdıqlansa, sakinlerni köçürmege ve yataqnı ğayrıdan tiklemek içün qarar alacaqmız", – dep bildirdi Yaltanıñ Rusiye memuriyeti.
Koreizdeki vaziyet eñ qıyın olıp qala, amma Yalta ve Alupka soqaqlarını da suv bastı. Guva özeniniñ suvı Yalta trolleybus parkını bastı – suv seviyesi oktâbrniñ 20-nde yarım metr oldı.
Sudaqta topraq suvları köterilgeni içün "Krımgazseti" müessisesiniñ alt qatını suv bastı. Suv mesken evlerniñ mağazlarına da kirdi.
Kommunal hızmetlerniñ gecesi
Aqyarda furtuna yeli tereklerni yol ve maşinalarğa tüşürdi. Acele hızmetler soqaqlarda zarar körgen maden inşaatlarnı pekitti ve bozdı. Bir künde şeerde yerli sakinlerniñ ava aqibetlerinen bağlı beş yüzden ziyade muracaatı qayd etildi. Kommunal hızmetler bütün gece yağmur ve yelde çalıştı.
"Mütehassıslarımız Aqyarlılar saba işke raat ketsin dep operativ bir şekilde çalıştı", – dep bildirdi şeerniñ Rusiye yolbaşçısı Mihail Razvojayev.
Şeer sakinlerine kezintilerden vazgeçmege, balalarnı ve ev ayvanlarını yibermemege tevsiye etildi.
Ava naqliyatqa qarşı
Kezlevde yaramay ava ve suv basuv sebebinden №1 ve №3 marşrutları boyunca tramvay areketleri vaqtınca toqtatılğan edi. Soñra tramvay areketi yañıdan başladı.
Yerli kommunal hızmetler aqibetlerni yoq etmek içün yağmur suv aqımlarını temizledi ve qabul quyularını kenişletti.
"Alınğan tedbirler yağmurda yekâne sağanaq kanalizatsiya sisteması olmağanından meseleni tolusınen çezmedi, amma iş bitken yerlerde suv tezce kete", – dep bildirdi Moskva kontrolindeki Kezlev memuriyeti.
Şeer kommunal hızmetleriniñ hadimleri soqaqlarnı yelnen tüşürilgen tereklerden temizlemege mecbur oldı.
Temizlenmegen sağanaq kanalizatsiyası Kezlev içün ilk sınav degil. Bir ay evelsi sağanaq sebebinden şeer soqaqlarını suv bastı, bundan soñ içtimaiy ağlarda oña "Qırım Venetsiyası" dep ayttılar.
Qırımda qorqunç furtuna oldı. Qırımğa küz keldi, kommunal hızmetler buña kene azır degil ediAlena Bardovskaya
Sinoptikler Qırımda ava pek deñişecegini tahmin etmey. Qırımnıñ Rusiye Fevqulâde vaziyetler nazirligi dağ ve dağ etegi rayonlarında, hususan Qırımnıñ cenübiy yalısında, fevqulâde vaziyetler ihtimali aqqında tenbiley, naqliyat işini ve eali yaşayışını boza bilgen topraqnıñ yüksek dımlılığı ve sel telükesi bar.
Küzde Qırım yarımadasında adet üzre furtuna mevsimi başlana. Lâkin er seferinde yaramay ava yerli infrastruktura ve sakinler içün sınav ola.
"Qırımda qorqunç furtuna oldı. Qırımğa küz keldi, kommunal hızmetler buña kene azır degil edi", – dep izaatlay vaziyetni Aqyarda yaşağan Rusiye blogeri Alena Bardovskaya.
Qırım yarımadasında eñ küçlü furtunalardan biri 2023 senesi küzde qayd etildi. O vaqıt "asırnıñ furtunası" dep adlandırılğan afat insanlarnıñ ölüminen, infrastruktura ve biznes obyektleriniñ büyük bozuluvı, yol ve mesken evlerniñ suv basıluvınen, energetika hatlarında qazalarnen bitti. Rusiye akimiyeti furtunadan 40 milliard ruble zarar keldi, dep bildirdi. Bazı aqibetleri alâ daa yoq etilmedi.
Viktoriya Veselova – RFE/RL içün yazğan jurnalistniñ telükesizlik maqsadınen qullanğan tahallüsi