Qırımtatar Milliy Meclis reisi Refat Çubarov iyülniñ 1-nde Yuqarı Rada tarafından Ukrainanıñ tamır halqları aqqında qanun leyhasınıñ qabul etilmesini tefsir etti.
«Mustaqil Ukrainanıñ terkibinde öz tarihiy toprağında tayin etme aqları ile beraber qırımtatar halqınıñ aqlarınıñ ğayrıdan tiklenilmesiniñ müimligini ukrain cemiyetine añlatmaq içün faaliyet köstergenlerge minnetdarlıq bildirmelimiz. Ümütsizlikke oğramağanları, devam etkenleri ve cemiyet arasında Ukrainanıñ tamır halqları aqqında qanunnıñ qabul etilmesiniñ kerekligini añlatqanları içün sağ olsunlar», – dep yazdı Çubarov.
O, qabul etilgen qanun Kremlniñ Qırım topraqlarında ruslar aqqında miflerni yoq ete ve Qırımnıñ işğalden azat etilüvini yaqınlaştıra, dep qoştı.
İyülniñ 1-nde, cumaaqşamı künü, Yuqarı Rada Ukrainanıñ tamır halqları aqqında qanun leyhasınıñ qabul etilmesine rey berdi.
325 millet vekili qoltuttı.
Ukraina prezidenti Volodımır Zelenskıy mayısnıñ 18-nde qırımtatar genotsidiniñ qurbanlarını añma kününde Ukraina yarımadanı kontrol altına qaytarmaq içün ğayret köstere, dep qayd etti. O, tamır halqlar qanun leyhasını parlament baqsın dep kirsetti, dep haber etken edi.
Zelenskıynıñ qayd etkenine köre, o, «Qırım platforması» sammiti ögüne qırımtatarlar ve qırımlılar içün «müim olğan» qanunlarnı imzalamağa istey, dep qayd etken edi.
Rusiye prezidenti Vladimir Putin Ukrainanıñ tamır halqlar qanun leyhası «ruslarğa qarşı yapılğan küçlü bir darbe» ola, dep bildirdi.
Ukraina prezidentiniñ Qırım Muhtar Cumhuriyetindeki temsilcisi Anton Korınevıç Rusiye prezidenti Vladimir Putinniñ Ukrainanıñ «tamır halqlar» qanun leyhasınen bağlı izaatlarını «propagandacı» dep adlandırdı.
İyünniñ 8-nde Rusiye Devlet Duması Ukrainanıñ qanun leyhasını takbih etken beyanatnı qabul etip, PACE ve OSCEge muracaat etmege niyetleri bar, dep bildirdi.
Yuqarı Rada deputatı, Ukrainanıñ PACE eyyetiniñ azası Rustem Umerovbuña cevap berip, «iç bir memleketniñ Ukrainanıñ iç işlerine qarışmağa aqqı yoq», dep qayd etti.
