Kreml, Ukraina prezidenti Volodımır Zelenskıyge «Qırım meselesini kötermemek kerek», dep bildirdi. UNIAN haber etkenine köre, bu aqta Rusiye prezidentiniñ matbuat kâtibi Dmitriy Peskov jurnalistlerge ayttı.
«Qırım meselesini kötermeyip, Putinniñ qolunı sıqsın. Bunı kesen-kes ayta bilem. Donbasnı aytsaq, endi aytqan edik: mında Putinniñ qolunı sıqmağa degil, Minsk añlaşmalarını yerine ketirmek kerek. O vaqıt bir-biriniñ qolunı sıqmağa ve ukrainalılar iç zıddiyetini al etkeninen tebriklemege mümkün olacaq», – dep ayttı Peskov, Zelenskıynıñ «1+1» telekanalınıñ yayınında aytqanlarını izaatlap.
Kreml, Minsk añlaşmalarınıñ yañartıluvı içün qoşma muzakerelerni angi şartlarda keçirmege razı olacaq sualine Peskov şöyle cevap berdi: «Mında Kremlden soramağa bile kerekmey».
«Mında zıddiyet taraflarınıñ iradesi olmalı, zıddiyet tarafları ise Kyiv ve «özüni ilân etken cumhuriyetler» ola», – dep ayta Peskov.
Zelenskıy, Rusiye prezidenti Vladimir Putin işğal etilgen Qırımnı Kyivge qaytarsa, «onıñ qolunı yüz kere sıqmağa azır», dep bildirdi.
Parijde dekabrniñ 9-nda aqşam Ukraina, Rusiye, Frenkistan ve Almaniya liderleriniñ körüşüvi olıp keçti. Ukraina prezidenti Frenkistan prezidenti Emmanuel Macron, Almaniya kantsleri Angela Merkel ve Rusiye prezidenti Vladimir Putin ile eki taraflı körüşüvler keçirdi.
Zelenskıy, Rusiye zenaatdaşı Vladimir Putinnen Qırım meselesini laf etmege azırlanğanını bildirdi, amma eki taraflı körüşüvde buña sıra kelmedi.
Ukraina prezidenti, Parijde keçirilgen «normand formatı» körüşüvinden soñ keçirilgen matbuat konferentsiyasında çıqışta bulunıp, Ukraina ve onıñ halqı içün deñişmeycek esaslarnı qayd etti. O, Donbas, Rusiye işğal etken Qırım Ukraina toprağı ola, dep qayd etti.
