Kreml Ukrayinada barışıq muzakerelerinde ABDni muvafaqiyetsizlikte qabaatlamaq içün şaraitler yaratmaq maqsadınen Yaqın Şarqtaki vaziyetni qullanacaq, dep tüşüne Cenkni tedqiq etüv institutınıñ (ISW) talilcileri.
ISW hususan Rusiye Tış işler naziri Sergey Lavrovnıñ martnıñ 5-nde yapqan beyanatına esaslana. Lavrov ABDniñ İranğa qarşı Amerika-İsrail operatsiyasınen bağlı aytqanlarını tenqit etip, Washington daa keniş manada Yaqın Şarqnı kerginleştirmege, hususan İran ve Basra körfezi memleketleri arasında munasebetlerni bozmağa tırışa, dep bildirdi.
"Lavrov bir çoq Rusiye siyasetçisi, siyasetşınası ve talilcisii ABDniñ muzakereler keçirgen memleketlerge qarşı operatsiya müddetleri ve Ukrayinadaki barışıq muzakereleri ile bağlar sebebinden qasevetlene, dep bildirdi. Muzakereler muvafaqiyetli keçse bile, Lavrov Birleşken Devletlerni İran ve Venesuelağa qarşı arbiy öpertsiyalar keçirgeninde qabaatladı", – dep aytıla esabatta.
ISW qoşqanına köre, Lavrov Rusiyeniñ 2025 senesi avgust ayında Alâskada olğan Rusiye-Amerika sammitiniñ "ruhu" söngeninden qasevetlengenine esaslana, amma aynı vaqıtta sammit "añlaşmalarından" daa müim degil, dep ayta. Talilciler Kreml Birleşken Devletler ve Rusiye resmiy bir añlaşma tizgen kibi bildirmek içün bu tam olmağan ıstılanı qullana, dep qayd ete.
İnstitut közetüvlerine köre, Lavrov Rusiye halqı ve Rusiye ittifaqdaşlarına belli bir işaret köstermek içün bir ses olaraq buluna, Trumpnıñ memuriyetini pek tenqit etmey.
"Diger Rusiye memurları ABDniñ İranğa qarşı arbiy operatsiyalarını Birleşken Devletlerni sert bir şekilde tenqit etmek, Rusiye ve Birleşken Devletlerniñ belâğat zıddiyeti ve ABD reberligi altında Ukrayina muzakereleriniñ ayırımğa oğratıluvı içün qullana", – dep aytıla metinde.
ISW örnek olaraq Rusiye Telükesizlik şurasınıñ reis muavini Dmitriy Medvedevni köstere, o, ABD prezidenti Donald Trumpnı İranğa qarşı arbiy operatsiyalar vaqtında barışıq ıntıluvları içün tenqit ete. Moskva "Medvedevni Kreml yapa bilgen daa ekstremal safsat içün qullana", aynı vaqıtta o, Rusiye akimiyetiniñ daa doğru baqışlarını aydınlata, dep qayd ete esabat müellifleri.
ISW Kreml Ukrayinada barışıq muzakerelerini sozmağa ve toqtatmağa tırışa, çünki ilk arbiy maqsadlarına zıt kelgen er angi muzakereni istemegenini köstere, dep bildire. Amma Rusiye bunı onı manalı muzakerelerge mecbur etecek er angi tedbir ya da ABD sanktsiyaları olmaycaq şekilde yapmalı.
Kreml ABD ve ittifaqdaşları ve ortaqları, şu cümleden İran kibi ABD duşmanlarınen eki taraflı munasebetlerini de saqlamağa mecbur. Moskvanıñ ABDge qarşı lafları İranğa qarşı Amerika-İsrail operatsiyalar başlağan soñ bu balansnı saqlamağa daa zor olğanını köstere bile, dep tahmin ete ISW.
"Rusiye Birleşken Devletlerniñ ortaq olaraq tenqidini Ukrayinadaki cenk muzakerelerinde muvafaqiyetsizlikte özüni aqlamaq içün qullana bile", – dep qoşa tedqiqatçılar.
Ukrayina prezidenti Volodımır Zelenskıy bildirgenine köre, Moskva, Kyiv ve Washingtoniştirakinen Rusiye-Ukrayina cenkini toqtatuv muzakereleri Yaqın Şarqtaki uruş areketleri sebebinden toqtadı.
Ukrayina, Rusiye ve ABD 2026 senesi başlanğanınen üç taraflı muzakerelerniñ bir qaç raundını keçirdi. Yanvar ayında ve fevralniñ başında eyyetler Abu-Dabide körüşti, fevralniñ ortasında muzakereler Jenevada oldı.
Yañı körüşüv martnıñ başında Abu-Dabide keçer, dep beklenile.
Körüşüv aqqında Yaqın Şarqtaki uruş areketleri başlamazdan evel añlaşqan ediler. ABD İranğa darbe endire. Tehran İsrail, Amerika arbiy bazaları ve Basra körfezindeki memleketlerde elçihanelerine ücüm ete.