Rusiye prezidentiniñ matbuat kâtibi Dmitriy Peskov Türkiye eyyetiniñ avgustnıñ 23-nde «Qırım platformasınıñ» sammitinde seslendirgen fikrine cevap berdi.
Onıñ fikirince, Türkiyeniñ Rusiye tarafından işğal etilgen Qırım fikirleri «tamamen yañlış» ola.
«Türkiye zenaatdaşlarımıznıñ böyle fikirlerini maqbul saymaymız, bunı tamamen yañlış dep sayamız. Türkiye zenaatdaşlarımızğa, diger memleketlerge kibi, Rusiyeniñ bu regionınen bağlı meselelerni sabırlı bir şekilde añlatmağa azırmız», – dep bildire Peskovnıñ aytqanlarını TASS agentligi.
Onıñ qayd etkenine köre, Rusiye Türkiyeni Qırım meselesinde farqlı fikri olğanına baqmadan ortaq dep saymağa devam ete.
«Türkiye ile munasebetlerniñ ortaq çizgisi bar. Em de tek beyanatlarda degil, qaviy bir ticariy-iqtisadiy ve yatırım işbirligi temeline esaslanğan bir ortaqlıq. Bu munasebetlerde farqlı fikirler yoq demek degil. Qırım mevzusı ciddiy farqlı fikir sayıla», – dep qoştı Peskov.
Hatırlatamız, Türkiye Tış işler naziri Mevlüt Çavuşoğlu Kyivde «Qırım platformasınıñ» sammitinde bu tedbir «Qırımnı Ukrainağa barışıq yolunen qaytaruv saifesini aça», dep bildirdi.
Avgustnıñ 23-nde Kyivde Qırımnı işğalden qurtaruv meselesinde ilk halqara formatnı resmiy şekilde işletecek «Qırım platformasınıñ» birinci inauguratsiya sammiti olıp keçti. Kyivde avgustnıñ 23-nde «Qırım platformasınıñ» birinci sammitinde iştirak etken 43 memleket ve halqara teşkilât Ukraina topraq bütünligini halqara seviyede tanılğan sıñırlarda ğayrıdan tiklemege çağırğan ortaq Beyannameni imzaladı. Sammit iştirakçileri «Rusiye Qırım ve Aqyarnıñ vaqtınca işğalini qanunlaştırıp olamaz», dep bildirdi.
Ukraina Tış işler naziri Dmıtro Kuleba sammitte qabul etilecek beyannamağa temsilcileri Kyivge kelmegen devletler qoşula bile, dep bildirgen edi.
Avgustnıñ 24-nde Rusiye Tış işler nazirligi memleket ve halqara teşkilâtlarnıñ «Qırım platformasında» iştirak etmesi «Rusiye topraq bütünligine qast etüv» ola, dep bildirdi. Kreml, «Qırım platformasınıñ» sammitini «Rusiyege qarşı duşmanlıq» dep adlandırdı.
Rusiye kontrolindeki «Qırım platformasını» ve avgustnıñ 23-nde Kyivde olıp keçken sammitini «Ukraina sakinlerine Qırımnı işğalden qurtaruv faaliyetini köstermek» içün «informatsion fon» dep adlandırdı.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
